Къэбэрдей-Балъкъэрым и къэрал телевиденэр «формат псо» жыхуаIэм хуэныкъуэщ. Ар къыщыхагъэщащ республикэм и Жылагъуэ палатэм иджыблагъэ щекIуэкIа зэIущIэм.

ЩIыналъэм и къэрал телевиденэм адэкIи зиужьынымкIэ зыхущыщIэм щытепсэлъыхьын папщIэ, республикэм и Жылагъуэ палатэм щызэхуэсат властым щыщхэр, жыла­гъуэ зэгухьэныгъэхэм хэтхэр, еджапIэ нэхъыщхьэхэм щылажьэхэр.
Жылагъуэ палатэм щэнхабзэм зиужьынымкIэ, псэкупсэ щIэиныр хъумэнымрэ хъыбарегъащIэ IэнатIэхэм ядэ­лэ­жьэнымкIэ и комиссэм и унафэщI Накуэ Феликс къызэхуэсахэм ягу къигъэкIыжащ къэралым зыхуигъэувыж къалэнхэр, зыхуей-зыхущыщIэхэр лъэныкъуэ псомкIи къызы­хуэтыншэу гъэзэщIа хъунымкIэ щIыналъэ-щIыпIэ хъыбар­егъащIэ IуэхущIапIэхэр зэрыщыIэм мыхьэнэ ин зэриIэр.
- ЩIыналъэхэм я хъыбарегъащIэ IуэхущIапIэхэр, щIэупщIэ нэхъ зэриIэм къыхэкIыу телевиденэр а псоми япэ иту, зэуIуу зэдэлажьэмэщ дэ щыхьэт дыщытехъуэфынур хэгъэгухэм хъыбархэр зэрыщызэбграгъэх Iэмалхэр ирикъуу къызэрыщызэгъэпэщам, апхуэдэуи УФ-ми абы и щIыналъэхэми щэнхабзэ, социальнэ-экономикэ, жылагъуэ-политикэ я лъэныкъуэкIэ дяпэкIи заужьынымкIэ гъуэгугъэлъагъуэ зэрыдиIэм, - къыхигъэщащ Накуэ Феликс. 
«КъБР-Медиа» къэрал кIэзонэ IуэхущIапIэм и унафэщIым и къуэдзэ Дзыгул МуIэед зэрыжиIамкIэ, Къэбэрдей-Балъкъэрым бжыгъэхэм тет и теленэтынхэр каналитIкIэ, 21-мрэ 34-мкIэ, къыщат. Мультиплекс щIыкIэм тет мыдрей и нэтынхэри «Россия-1», «Россия-24» телеканалхэм, хэчыхьа щIыкIэр и гъуазэу, пычыгъуэ-пычыгъуэкIэрэ зэрыдагъэувэж IэмалхэмкIэ къащыхуогъэлъагъуэ. Радиом и гугъу тщIымэ, а щIыкIэм тету, «Радио России», «Маяк», «Вести ФМ» каналхэмкIэ республикэм и макъыр «щызэхыдох».
«Аналог» къэтыкIэмкIэ «Къэбэрдей-Балъкъэр» телеканалым республикэм щыпсэухэм ящыщу къыхузэщIэубыдэр и процент 71,3-рэщ. Нэтынхэр къат «МИР 24» урысейпсо IуэхущIапIэм ди щIыналъэм хухиха 49-нэ телечастотам тету (махуэ къэс - сыхьэти 8-кIэ, тхьэмахуэм - сыхьэт 56-кIэ). 
А каналымкIэ къагъэлъагъуэхэр щIыпIэ-щIыпIэкIэрэ щызэлъащIысыфын хуэдэу, республикэм телестанцу 6 щагъэуващ: Налшык къалэ (киловатт 1 и лъэщагъыу), Сэр­макъ къуажэм деж (ватт 250-рэ и лъэщагъыу), Къулъ­къужын Ищхъэрэ и Iэгъуэблагъэм (ватти 100 и лъэщагъыу), Джэрпэджэж жылэм и гъунэгъуу (ватти 100 и лъэщагъыу), Зеи­къуэ и Iэхэлъахэм (ватти 100 и лъэщагъыу), Бахъсэн Ипщэ и гъунэм (ватти 100 и лъэщагъыу).   
- Дэ къыдгуроIуэ телесигналхэр щызэбгрызыгъэкIыу Налшык къалэм дэт Iэмэпсымэ (передатчик) нэхъыщхьэр зэ­хъуэкIын зэрыхуейр, хухаха и пIалъэр зэрикIам, республикэм и щIыналъэр къызэщIэубыдэнымкIэ и къарур зэры­пэмылъэщыжым къыхэкIыу. КъинэмыщIауэ къыдолъытэ, Къэбэрдей-Балъкъэрым телеканал щхьэхуэ диIэн хуейуэ, щIыналъэм щызекIуэ къэралыбзэхэмкIэ, жэщ-махуэ имыIэу, лэжьэн хуэдэу. Тележурналистхэм абыкIэ къахуэтынущ икIи къахуэгъэлъэгъуэнущ щIыпIэдэлъху лъэпкъхэм ижькIэрэ къыддекIуэкI хабзэ-бзыпхъэ екIухэр, тхыдэм щыщ напэкIуэцIхэу дызэкъуэзыгъэувэхэр, ди пшыналъэхэр, къэ­фэкIэ дахэхэр, сабий джэгукIэхэр, ныбжьыщIэхэр зэра­гъасэ нэщэнэхэр, ди япэ итахэм къытхуагъэна щапхъэ дахэхэр, щIыналъэм социально-экономикэ и лъэныкъуэкIэ ди зэфIэкIыр, нэгъуэщI абы хуэдэхэри, – щыжиIащ зэIущIэм и кIэухым КъБР-м и Жылагъуэ палатэм и тхьэмадэм и къуэ­дзэ Туменов Мурадин. 
КЪУМАХУЭ  Аслъэн.