Орус география обществону «Альтаир» жаш тёлю клубуну келечилери Къаялы тауну Таракъла тёппесине чыкъгъанды, жолоучулукъларын жаш адамла Ата журтну къоруулаучуну кюнюне бла Уллу Хорламны 80-жыллыгъына атагъандыла.

Таракъланы бийикликлери 2258 метрге жетеди, аланы башындан Баш Кавказ хребетни Минги таудан Казбекге дери кесеги тамаша кёрюнеди. Жолоучуланы араларында таулагъа чыгъаргъа энди юйрене тургъанла, сынамлы ёрлеучюле да бар эдиле. Биринчи къауумгъа киргенле башланнган турист хазырланыуну ётгендиле, къарлы эм юзюлюрге боллукъ жерледе жюрюуню эничиликлерин биледиле, алагъа бу жолоучулукъ тау туристлеге къошулууну белгиси болгъанды. 

Таракъланы башына ала Элекан-суу ауузну жанындан ёрлегендиле. Алгъа кюнде къар жаугъанына къарамай, ала ауузну башына дери внедорожникледе чыгъалгъандыла. Сууукъ, жел да чырмау этмегендиле, къауумну битеу келечилери да тауну тёппесине жетгендиле. Бийикликден а Минги тау, тёгерек да аламат ариу кёрюннгендиле. Таракъла бла алайдан узакъ болмай Шау-Хуна аууш Элекан-Суу бла Чаты ауузланы бёледиле, Нальчикден Чегем ауузуна жол ачадыла. Былайы агъачлагъа, тау жайлыкълагъа, къаялагъа бла дорбунлагъа байды. Совет жыллада бери туристлени кёп къауумларын келтирип тургъандыла, бусагъатда бери алай кёп адам жюрюмейди.     

Тёреде бола келгенича, къаяны башында 1942-1943 жыллада Кавказ ючюн жан берген совет аскерчилеге эсгериу къанга орнатылгъанды, андан эки ыйыкъ алгъа уа обществону келечилери аллай къанганы Суу-Акъгъан дорбунда да салгъандыла. Аны бла байламлы Жаш тёлю араны башчысы Мокъаланы Тенгиз жаш тёлю бла бу халда ишлеуню магъанасы уллу болгъанын белгилегенди.  

- 2023 жылда биз «Альтаирни» къышда жолоучулукъларыны тёресин башлагъанбыз, эм алгъа Лха тауда биринчи эсгертиу къанганы орнатханбыз. Андан бери аллай къангаланы Алмалы къаяны, Инал сыртны, энди уа Таракъланы башларында салгъанбыз. Бу жолоучулукъла жаш тёлю туризмни быллай тири тюрлюлерин, таулагъа чыкъгъанда Ата журтубузну тарыхын билиуню, батыр ата-бабаларыбызны атларын ёмюрлюк этиуню жаратханына тюшюннгенбиз. Бу ишлени ала кёп жылланы унутмазларына, аланы жюреклеринде жарыкъ ызларын къоярларына, аланы ызларындан бу бийикликлеге ёрлегенле уа бусгъатдагъы жаш адамланы иги сёз бла эсгерирлерине ийнанама. Кезиулю ёрлеуюбюзню уа Хорламны кюнюне атарыкъбыз, ол майда боллукъду, - деп билдиргенди Тенгиз.

Жолоучулукъну обществону Жаш тёлю арасы республиканы Курортла эм туризм министерствосуну, От тюшюуге къажау-къутхарыу службаны, Чекчи управленияны себепликлери бла къурагъанды.   

Кульчаланы Зульфия.