Кёп болмай Къабарты-Малкъар къырал университетни право, экономика эм финансла  институтунда (ИПЭ эм Ф) Къабарты-Малкъарда инсанланы финансла  жаны бла билимлерин ёсдюрюу эм  культураларын къурау  ара къуралгъанды.

Анга жыл санларына да къарамай, бу жаны бла сейирлери болгъанла  жюрюрге  боллукъдула. Мында тюзюнлей курсла ётерикдиле, мобиль  приложенияланы, интерактив платформаланы эм башха жангы амалланы хайыры бла билим берирча онг къураллыкъды. Бютюнда жаш  адамланы къауумуна аслам эс буруллукъду. Ол санда Миллет банкны  республикада бёлюмюню келечилери документлени жарашдырыуда, эсгертиуле бериуде да  болушурукъдула. 

 - Право, экономика эм финансла институтда финансла жаны бла билим  берирча  сынамлы специалистлери, мюлк-техника мурдору да барды эм  ол жетишимли проектлери бла  белгилиди. Эсге сала айтсакъ,  тёрт жыл мындан алгъа  КъМКъУ бла Миллет банкны бёлюмю байламлыкъда ишлерге келишим этгендиле. Аны чеклеринде бирге ачыкъ эшиклени кюню, лекцияла, мастер-классла эм башха акцияла да бардырыладыла.

Аны бла бирге юч жылдан бери  право, экономика эм финансла жаны бла  институт,  вузгъа киргинчи хазырлау эм усталыкъ сайларгъа болушуу  управление школчуланы арасында финансладан ачыкъ олимпиада бардырады. Дагъыда «Университетни технологиялы  предпринимательство платформасы» деген проектни чеклеринде  «Финансла жаны бла билим» деген  кейс-чемпионат да барады. 

ПЭ эм Ф институтну   преподавательлери КъМКъУ-ну  бёлюмлеринде экономика бла финансладан дерсле бередиле. Аны бла бирге  квалификацияларын  ёсдюрюрча дайым  энчи курсланы ётедиле,- дейди институтну таматасы  Елена Машукова.

Регионлада финансла жаны бла арала  2030 жылгъа дери  инсанланы билимлерин ёсдюрюрча стратегиялы проектни чеклеринде ишлейдиле. Россейни Финансла жаны бла министерствосундан билдиргенлерича, бусагъатда къыралда аллай 63 ара барды, аладан жыйырмасы вузланы мурдорларында жетишимли ишлейдиле.