«Сабийлени саулукълары эмда къоркъуусузлукълары ючюн» деген  башламчылыкъгъа къатышханланы саны  ёсгенлей барады. Аны чегинде наркотиклеге къажау бардырылгъан ишлеге абадан классланы юч мингден аслам окъуучусу бла аланы ата-аналары келгендиле.

Наркотикле бла уулу затла адамны чархына, мыйысына да къаллай уллу заран салгъанларыны юслеринден сабийлеге Нальчикни биринчи эм жыйырманчы мектеплеринде айтылгъанды. Жаш адамла бла ушакъланы Наркотиклени законсуз сатыу-алыугъа контроль этиу службаны, Жаш тёлюню ишлери жаны бла эм Спорт министерстволаны, Нальчикни билим бериу департаментини келечилери, Ич ишле министерствону Нальчикде управлениясыны акъылбалыкъ болмагъанланы ишлери жаны бла инспекторлары, дин ахлула, спортчула бардыргъандыла. Ала наркотикле кеслерине юйренчек къалай этгенлерини, саулукъну бузгъанларыны, аланы сатыу-алыу бла кюрешгенле уа не жууапха тартылгъанларыны юсюнден айтхандыла.

Акцияны къурагъанла уа окъуучулагъа уулу затланы бир кере окъуна кёргенле аласыз болалмай къалгъанларын, ала салгъан алдаулу жолдан къутулуу къыйын болгъанын эсгертгендиле. Ахырында жыйылгъанла барысы да бирге суратха тюшгендиле.

Кульчаланы Зульфия.