Жаз башы келирине алай кёп къалмагъанды, ары дери уа бахчада орнатырыкъ тахта кёгетлени, сёз ючюн, нашаланы зыгытларын хазырлау бла аз-аздан кюрешип башларгъа боллукъду. Аны энчиликлерини юсюнден Россельхоз араны Къабарты-Малкъарда бёлюмюню келечилери хапарлагъандыла.

Наша иги тирлик бла къууандырыр ючюн, аны зыгытларын тынгылы хазырларгъа, жерин жарашдырыргъа, кесине да тийишлисича къарап, къурт-къумурсхаладан къоруулап турургъа керекди. Урлугъун орунлагъа салгъандан сора, суууна, семиртгичлерине, хауасына да уллу кёллю болмагъыз. Орунла дагъыда жарыкъда турургъа керекдиле - наша аны бек излейди. Чыракъ неда кюн жарыгъы кёп болса, зыгыт терк тамырланады, тири айнып башлайды. Хар несин да тап этсе, ол 25-30 кюнден сора жерге кёчюрюлюрге хазыр болады. Ол халгъа жетер ючюн а, юсюнде эм азындан беш тынгылы чапыракъ чыгъаргъа керекди.

Зыгытлагъа къарагъан кезиуде эм биринчиден тамырларына сакъ болугъуз. Сууну аз неда мардасындан кёп салса, ала къарыусуз болургъа боллукъдула. Ауруула да кеслерин сакълатмайдыла: олсагъат хлороз, фузариоз жайылып, тамырларын, бутакъларын чиритип башларыкъдыла. Чибинле, къуртла, битле, къубаллекле да битимге заран салыргъа бек ёчдюле.

Алай болмаз ючюн, айтылгъаныча, отоуда хауаны мылылыгъына, жылылыгъына, кюн неда чыракъ жарыкъ болурларына эс буругъуз, суу салыгъыз, къурт-къумурсхаладан къоруулагъыз, семиртгичлени уа аммиак угъай, фосфор-калий тюрлюлерин хайырланыгъыз. Зыгытлада заранлы затланы эслегенлей,  инсектицид препаратланы себигиз, аурууладан а фунгицидлени хайырланыгъыз. Кеслерин да химия угъай, биология маталлы, къоркъуусузлу тюрлюлерин. Къайсысы болса да, ала Россей Федерацияда хайырланыргъа жараулу пестицидлени бла агрохимикатланы къырал тизмесинде болургъа керекдиле. Сорлугъугъуз бар эсе уа,  Россельхоз арагъа атланыгъыз неда сёлешигиз. Аны адреси эмда телефону: Нальчик, Малкъар орам, 100, 8(8662)74-25-74.

Улбашланы Мурат.