Къэбэрдей-Балъкъэрым футболымкIэ и гуп нэхъыщхьэм и щIымахуэ чемпионатыр иухыным къэнэжар зы джэгугъуэ закъуэщ. АрщхьэкIэ иджыри наIуэкъым абы и дыщэ медалхэр зыIэрыхьэнур.
2024 - 2025 гъэхэм Къэбэрдей-Балъкъэрым щекIуэкI футболымкIэ щIымахуэ чемпионатым зэрыщIидзэрэ бжьыпэр зыIыгъ Ислъэмей и «Родник»-м ар иужь дыдэ джэгугъуэм IэщIэкIынкIэ шынагъуэ щыIэщ. Ар къызыхэкIар, куэдым хуамыгъэфащэу, щэбэтым псыгуэнсудэсхэм щахуэзам очкоитI зэрафIэкIуэдаращ. Ику иту иджыри къэс я хьэрхуэрэгъухэм топ плIырыплI яхудэзыгъэкIыурэ нобэм къэса ислъэмейдэсхэм, «Псыгуэнсум» и гъуэр зэ нэхъ мыхъуми хагъэщIэфакъым. КъапэщIэтахэми апхуэдэ къайхъулIэну щIэхъуэпсауи фIэщщIыгъуейщ. Сытми, зэIущIэр иухащ, бжыгъэр къызэIуамыхауэ.
И хьэрхуэрэгъу нэхъыщхьэм очкоитI фIэкIуэду, чемпионыгъэр къазэрыхуэкъуэплъам игъэгушхуа «Искра»-м и футболистхэм хэти «зэпкъратхъыну» хьэзырт. ЯгъэIэпхъуауэ щытауэ Налшык и «Мурбек ФШ»-м IущIэну бэрэжьейм къапэщылъым абыхэм ерыщу зыхуагъэхьэзырат. АрщхьэкIэ… я хьэрхуэрэгъухэр къэкIуакъым. Арати, мыджэгухэу, 3:0-у текIуауэ хуатхащ.
Абы ипэжкIэ «Искра»-м «Урыхум» и щхьэр кърагъэIэтакъым икIи и гъуэм жэуапыншэу топибгъу (!) дигъэкIащ. Алътуддэсхэм я пашэ Апажэ Чэрим а зэIущIэм плIэнейрэ къыщыхэжаныкIащ икIи гъуащхьауэхэм я зэпеуэм бжьыпэр щызыIыгъ ХъутIэ Анзор лъэщIыхьэжащ. Псори зэхэту а щIалитIым топ пщыкIущ-пщыкIущ я хьэрхуэрэгъухэм худагъэкIащ. Мыбдежым къыхэгъэщын хуейщ Къэбэрдей-Балъкъэрым и щIымахуэ чемпионатым футболист куэд зэрыхэтыр, профессиональнэ командэхэм щыджэгуу. Абыхэм ящыщ зыщ ХъутIэ Анзори. Ар зыхэт Псыхуабэ и «Мэшыкъуэ-КМВ»-м зэхьэзэхуэм зыхуигъэхьэзырыну зэхуэсыжырти, ди щIалэр ираджэжащ, адэкIи мы щIымахуэ чемпионатым хэтыжынукъым. Абы къыхэкIкIэ Апажэ Чэрим Iэмал иIэщ гъуащхьауэхэм я зэпеуэм щытекIуэну, иужь джэгугъуэм зы топ нэхъ мыхъуми щыдигъэкIмэ. ФIэщщIыгъуейщ Бабугент и «Логоваз»-м и пашэ Мокаев Таулан къылъэщIыхьэжыну. Абы дигъэкIар топипщIщ.
Аращи, мазаем и 16-ращ Къэбэрдей-Балъкъэрым 2024 - 2025 гъэхэм я щIымахуэ чемпионатым щытекIуэнур хэтми щызэхэкIынур. Гъэмахуэ зэхьэзэхуэм къыщихьа дыщэр Псынэдахэ и «Родник»-м игъэбэгъуэну хьэмэ Алътуд и «Искра»-м иужь дыдэ зэIущIэм ар къыIэщIихыну? А упщIэм и жэуапыр къыдэзытынур пщэдей щыIэну зэпэщIэтыныгъэхэращ. Дыжьын медалхэм ерыщу щIэбэн Налшык и «Горис»-р псынэдахэдэсхэм яхухэмыгъащIэмэ, чемпионыгъэр яIэщIэкIауэ къэплъытэ хъунущ. Шэч къытезыхьэ щыIэу къыщIэкIынукъым иджыри къэс псоми зыфIахьа Къэрэгъэш и «Иналым» «Искра»-ри зэрытекIуэнум. ЗэрыжаIэщи, деплъынщ!
Къэбэрдей-Балъкъэрым футболымкIэ и гуп нэхъыщхьэм 2024-2025 гъэхэм я щIымахуэ чемпионатым щекIуэкIа иужь зэIущIэхэм иджы щыгъуазэ фыхуэтщIынщ. Мис ахэр: «Инал» (Къэрэгъэш) – «Спартак-Д» (Налшык) - 0:3, «Псыгуэнсу» (Псыгуэнсу) – «Родник» (Псынэдахэ) – 0:0, «Урыху» (Урыху) - «Искра» (Алътуд) – 0:9, «Шагъдий» (Зеикъуэ) –«Мурбек ФШ» (Налшык) – 2:1, «ГорИс» (Налшык) – «Сады Баксана» (Ислъэмей) – 2:0, «Логоваз» (Бабугент) – «Ислъэмей» (Ислъэмей) – 1:4, «Малка» (Малкэ) - «Зэрэгъыж» (Зэрэгъыж) – 7:1.
Къызэрыхэдгъэщащи, кIэух джэгугъуэр нобэрэ пщэдейрэ зэхэтынущ. А махуэхэм зэIущIэнущ: мазаем и 15-м – «Сады Баксана» - «Малка», «Мурбек ФШ» - «Псыгуэнсу», «Зэрэгъыж» - «Логоваз»; мазаем и 16-м – «Шагъдий» - «Спартак-Д», «Родник» - «ГорИс», «Искра» - «Инал», «Ислъэмей» - «Урыху» командэхэр.
Хьэтау Ислъам.
