КъБР-м и Парламентым и Жылагъуэ советым и япэ зэ­IущIэ екIуэкIащ. Ар къыщы­зэIуихым, республикэм и хабзэубзыху IуэхущIапIэм и Уна­фэщI Егоровэ Татьянэ жиIащ Жылагъуэ советым и Поло­женэм тету абы хэтынухэр зэрыхахар икIи КъБР-м и Парла­ментыр арэзы зэрытехъуар. 

Егоровэм къыхигъэщащ со­ветым хагъэхьэнухэр иджы республикэм и хабзэубзыху Iуэху­щIапIэм щыIэ политикэ партхэм я фракцэхэми Лъэпкъ зэхущытыкIэхэмкIэ комитетми къагъэлъагъуэ зэрыхъур.
- КъБР-м и Парламентым и Жылагъуэ советым хэтхэр    пщIэ зиIэ, лэжьыгъэшхуэ зи щIыбагъ къыдэлъ цIыхухэрщ. Шэч хэмылъу, абыхэм я зэ­фIэкIыр ди хабзэубзыху IуэхущIапIэм щхьэпэнущ, - жиIащ Егоровэ Татьянэ. - Къэбгъэлъа­гъуэмэ, Жылагъуэ советым и къалэн нэхъыщхьэр ар чэнджэщэгъу хъунырщ, КъБР-м и Парламентымрэ цIыхубэмрэ я зэпыщIэныгъэр, къэпщытэныгъэ Iуэхухэр къызэригъэпэ­щы­нырщ. Еханэ зэхуэсыгъуэм дэ­лэжьа советым лэжьыгъэш­хуэ зэрыригъэкIуэкIар къыхэзгъэ­щыну сыхуейт. Ар КъБР-м и Парламентым и комитетхэм купщIафIэу дэлэжьащ, респуб­ликэ законхэм я проектхэр щагъэхьэзырми къэпщытэныгъэ­хэр егъэкIуэкIын щыхуейми. Жылагъуэ советым и чэн­джэщкIэ, республикэм и со­циаль­но-экономикэ Iуэхухэм еп­хауэ (мэкъумэш IэнатIэм, фэтэр куэду зэхэт унэхэм, кIэ­рыхубжьэрыхум, цIыхухэм я узын­шагъэр хъумэным ехьэ­лIауэ) кIэлъыплъыныгъэхэр ­едгъэкIуэкIащ. Дыщогугъ ­КъБР-м и Парламентым и еб­ланэ зэхуэсыгъуэм и Жылагъуэ советми и лэжьыгъэр жыджэ­-ру щытыну.
ЗэIущIэм зэдэарэзыуэ Жы­лагъуэ советым и унафэщIу щыхахыжащ Бечелов Ильяс. Егоровэ Татьянэ жиIащ КъБР-м и Парламентым и япэ, етIуанэ, ещанэ зэхуэсыгъуэхэм я де­путату щыта Бечеловыр сыт щыгъуи и Iуэхум фIыуэ хи­щIы­кIыу къызэрыгъуэгурыкIуэр, дя­пэкIи абы и зэфIэкIыр къащхьэпэну къызэрилъытэр.
Бечелов Ильяс жиIащ ­КъБР-м и Парламентыр и Iуэху зехьэкIэкIэ нэхъ пашэхэм сыт щыгъуи зэращыщыр икIи зи дзыхь къезыгъэзахэм фIыщIэ зэрахуищIыр. «Жэуаплыныгъэ зыпылъщ Жылагъуэ советым и лэжьыгъэр. Iуэхугъуэ куэд къыт­пэщылъщ кIэлъыплъы­ныгъэхэр къызэгъэпэщыным, КъБР-м и Парламентыр жылагъуэ IуэхущIапIэхэм зэрадэ­лажьэр егъэфIэкIуэным теу­хуауэ».
ЗэIущIэм щыхахащ Жыла­гъуэ советым и унафэщIым и къуэдзэхэри. Ахэр КъБР-м и Парламентым и етхуанэ, еханэ зэхуэсыгъуэхэм я депутату щы­та, Налшык къалэм и лицей №2-м и унафэщI Пешковэ Люд­милэрэ республикэм и ­хабзэубзыху IуэхущIапIэм и  япэ, етIуанэ, етхуанэ зэхуэсы­гъуэхэм я депутату щыта Гугу Владимиррэщ.
КъищынэмыщIауэ, КъБР-м и Парламентым и Жылагъуэ советым и комиссэу щы къызэ­рагъэпэщащ, социальнэ, экономикэ Iуэхухэм, законо­да­тельст­вэм епхауэ. 

БАГЪЭТЫР Луизэ.