КъМР-ни Парламентини  Маданият, граждан обществону айнытыу эм  информация политика жаны бла комитетини башламчылыгъы эмда Къырал музыка театрны болушлугъу бла музыка-поэзия концерт къуралгъанды. Ол Ата журтну къоруулаучусуну жылына аталгъанды. 

Профильли комитетни башчысы Текуланы Амырбийни айтханына кёре,  тюбешиу тарыхны сакълар, жаш тёлюню Ата журтубузгъа сюймекликге юйретир мурат бла эмда Уллу Ата журт урушда Хорламны 80-жыллыгъын  белгилеуню чеклеринде къуралгъанды. Быллай жумуш бла ветеранлагъа, энчи аскер операциягъа къатышханлагъа этилген хурметни кёргюзтюрге сюйгенлерин чертгенди депутат.
Концертге къараргъа келгенлени араларында Парламентни спикери Татьяна Егорованы башчылыгъында депутатланы къаууму, КъМР-ни Правительствосуну башчысыны орунбасары Залим Кашироков, «Ата журтну къоруулаучулары» фондну регион бёлюмюню башчысы Муаед Дадов, энчи аскер операцияны ветеранлары болгъандыла. Алай баш къараучула  уа Нальчикни орта школларыны окъуучулары эдиле. 
Жыйылгъанланы алгъышлай, Муаед Дадов СВО-ну ветеранларына, бюгюн аскерчи борчларын толтура тургъанлагъа жигитликлери ючюн ыспас этгенди. Аланы аталарына, аналарына уа быллай батыр уланланы, къыралны керти инсанларын ёсдюргенлери ючюн ыразылыгъын билдиргенди. Ол быйыл энчи аскер операция Хорлам бла бошаллыгъына эмда жигит аскерчилерибиз юйлерине сау-саламат къайтырларына ышаннганын чертип айтханды. 
Концерт программа сагъат бла жарым баргъанды. Сахнадан айтылгъан жырлада бла назмулада туугъан журтха сюймекликни, Ата журтха къуллукъ этиуню юслеринден айтылгъанды. 
Ахырында  Россейни гимни согъулгъанды. Артистле бла бирге аны залда жыйылгъан жаш адамла да жырлагъанлары бек магъаналыды.

КъМР-ни Парламентини пресс-службасы.