Тюнене Къабарты-Малкъаргъа «Биринчилени атламлары» деген битеуроссей жамауат-къырал сабий эм жаш тёлю биригиуню таматасы Россейни Жигити Артур Орлов келгенди. Артур Валерьевични бу жолоучулугъу иш бла байламлыды.
Биринчиден ол, жаш тёлю бла тюбеширге сюйгенин билдирип, «Пять колец» спорт академияны жокълап, жаш адамла бла эрттен зарядкагъа къатышханды. Анга уа КъМР-ни жаш тёлюню ишлери жаны бла министри Азамат Люев бла «Биринчилени атламлары» биригиуню регион бёлюмюню таматасы Аслан Шипшев да къошулгъандыла. Андан къысха репортажны Артур Орлов кесини телеграм-каналында: «Бу кюнледе Нальчикде бардырабыз ишибизни», - деген билдириу бла салгъанды.
Ызы бла уа сыйлы къонакъ КъМР-ни Башчысы Казбек Коков, регионну Правительствосуну келечилери, «Биринчилени атламлары» биригиуню келечилери, насийхатчыла эм педагогла бла тюбешгенди. Алагъа бюгюнлюкде жаш тёлю политика къалай къуралып бардырылгъаныны, къаллай онгла берилгенлерини Азамат Люев билдиргенди.
- Итиниулюгю болуп, бизге болушлукъ излей келген хар жаш адамгъа да билеклик этебиз, онгла къурайбыз, - деп чертгенди министр.
КъМР-ни Башчысы Казбек Коков да республикада жаш тёлюню патриот ниетде, адеп-къылыкъгъа юйретиуге аслам эс берилгенин билдиргенди. Власть органла къачан да бу ишни тохтаусуз бардыргъанларын ол ёхтемлик бла айтханды.
Ызы бла биригиуню регион бёлюмюню иши озгъан жыл къалай бардырылгъаныны эсеплери сюзюлгендиле. Аны КъМР-ни Правительствосу бла байламлыкъда жетишимли ишлегенине эс бёлюннгенди. Аслан Шипшев билдиргеннге кёре, озгъан жыл хар муниципалитетде да «Биринчилени атламлары» биригиуню бёлюмлери ачылгъандыла.
- Бизни регионну Башчысыны башламчылыгъы бла «Жигитлени тёлюлери» деген проект жашауда бардырылып башланнганды. Анга энчи аскер операциягъа къатышхан аскерчилерибизни эмда бизни биригиуню келечилери тири къатышадыла. Быллай ахшы ишни башха субъектле да юлгюге алырла деп ышанабыз, - дегенди Аслан Шипшев.
Андан сора сабий организацияла бла къаллай ызда ишлесе тап боллугъуна да къаралгъанды. Анда кёп жангы амалланы туура эте, бу ишге аслам магъана берирге кереклиси эсгертилгенди.
Тюбешиуню ахырында сёз кеслерин кёргюзтген фахмулу жашлагъа бла къызлагъа берилген эди. Ала быйыл къаллай проектлени жашауда бардырыргъа хазыр болгъанларын ачыкълагъандыла эм ол ишде не болушлукъ кереклисин билдиргендиле. Жыйылгъанла, жаш адамланы айтханларына эс бёлюп, не жаны бла да онг тапдырыргъа сёз бергендиле.
Ахырында 2025 жылда регионда жаш тёлю политикада къаллай жумушла белгиленнгенлерин сюзгендиле.
Таппасханланы Аминат
