Бу кюнледе халкъла аралы россейли RT телеканалда Къабарты-Малкъарны юсюнден «Ihland Vision» деген эки сериялы документли бериу кёргюзтюлгенди. Аны озгъан жыл кюз артында республикада алгъан эдиле.
Бериу эфирге ингилиз тилде чыкъгъанды эмда анга дунияны 100 къыралындан аслам жерде жашагъанла къарагъандыла. Жарашдырылгъан программа Россейни тюрлю-тюрлю регионларында жашагъан халкъланы юслеринден хапарлайды, табийгъат байлыкъларын, тамашалыкъларын кёргюзтеди эм алада жашагъан адамланы ич дунияларын ачыкълайды. Бериуню ингилизли журналист Питер Скот хазырлагъанды, ол RT телеканалда эрттеден бери ишлейди, сынамы да уллуду.
Документли фильмни хазырлагъанла Къабарты-Малкъарда бир минг километрден аслам жолну къыдыргъандыла. Чыгъармачылыкъ къауум Нальчикде, Бызынгыда, ол тийреледе орналгъан альпинист лагерьде, Черек эм Чегем ауузларында, Чирик кёлде, Огъары Малкъарда эмда Зольск районда болгъандыла. Ол кезиуню ичинде бериуню эки сериясы алыннганды: бири табийгъатыбызны ариулугъуна, экинчиси – республикада жашагъан адамлагъа, аланы маданият хазналарыны байлыкъларына аталгъандыла.
Белгили россейли телеканалны къаууму республикалы тележурналистлени да профессионал жаны бла билимлерине бийик багъа бергенди. Ала бериулени хазырлагъан кезиуде къонакълагъа дайым болушлукъ этгенлей тургъандыла. Бизни журналистлени санында РИА КБР информация агентствону корреспонденти, Орус география биригиуню жаш тёлю арасыны республикада келечиси Мокъаланы Тенгиз болгъанды. Андан сора да, ара шахардан келген къонакъла республикада жашагъан халкъланы халаллыкъларын эм къонакъбайлыкъларын белгилегендиле. Бериуню продюсери Марина Буйновская айтханнга кёре, алтын кюз артыны сейирлигин кёргюзтюрге ала Къабарты-Малкъарны бошдан сайламагъан эдиле, нек дегенде, аны табийгъаты эм ол жерледе жашагъан халкъланы культуралары башхалагъа ушамагъанча сейирликдиле.
«Биз телевизоргъа къарагъанлагъа Россейни тюрлю-тюрлю регионларын эм алада жашагъан халкъланы кёргюзтюрге кюрешебиз. Бу программа къуралгъанлы эки жыл болады, биз кёп жерледе айланнганбыз. Борчубуз олду – Россейни ич дуниясын кёргюзтюрге, ол къаллай эсе да, биз аны кесибиз къарап къалай кёрген эсек да, телевизоргъа къарагъаннга тюз алай кёргюзтюрюкбюз. Программаны атын орус тилге кёчюрсек, «Взгляд изнутри» деп алай болады. Биз дуния башында жашагъанла Россейни уллулугъун, аны деменгилилигин эм табийгъатыны тюрсюнлюлюгюн башхала да кёрсюнле деп кюрешебиз. Бек уллу байлыгъы уа къыралны - аны халкъыды, фахмулу, ич дуниялары бай, къонакъбайлыкъ эте билген инсанлары, Ата журтларын чексиз сюйгенле, аны тарыхын, адет-тёрелерин сакъларгъа эм байыкъландырыргъа итиннгенледиле. Биз кёп айланабыз Россейде, алай Къабарты-Малкъардача ачыкъ бизге бир жерде да тюбемегендиле, мында адамладан кёрген жылылыкъны бир жерде да сынамагъанбыз. Къонакъбайлыкъны, жюрек ачыкълыкъны юсюнден айтханда уа, ала бир жерде да болмагъанча алай аламат эдиле»,– дегенди Марина Буйновская.
Дагъыда Буйновская программаны хазырларгъа себеплик этгенлеге, ол санда КъМР-ни Башчысы Казбек Коковха, КъМР-ни Маданият министерствосуна, ГКУ «КъМР-Медиагъа» эм КъМР-ни Курортла эм туризм министерствосуна жюрек ыразылыгъын билдиргенди.
