Республикэм и къуажэхэмрэ къалэхэмрэ зэIузэпэщ щIыным теухуауэ щытащ КъБР-м и Iэтащхьэм иригъэкIуэкIа зи чэзу зэIущIэр. Абы хэтащ КъБР-м транспортымрэ гъуэгу хозяйствэмкIэ и министр ДыщэкI Аслъэн, КъБР-м ухуэныгъэмрэ псэупIэ-коммунальнэ хозяйствэмкIэ и министр Журавлев Андрей, Налшык къалэ администрацэм и Iэтащхьэ Ахъуэхъу Таймураз сымэ.
КъулыкъущIэхэр тепсэлъыхьащ «Инфраструктура для жизни» лъэпкъ проектыщIэм ипкъ иткIэ, жылагъуэ зэхуэсыпIэхэр зыхуей хуэгъэзэным.
Къапщтэмэ, Хэкум и хъумакIуэм и илъэсым ягъэзэщIэну я мурад Iуэхушхуэр яублэнущ, ар гектарих хъууэ Налшык щаухуэну ТекIуэныгъэм и паркращ. Абы и лъэс лъагъуэ нэхъыщхьэу щытынущ ЛIыхъужьхэм яхухэхамрэ ЩIыхьым и жыг хадэ цIыкIумрэ. Къалэдэсхэмрэ Налшык щыхьэщIэхэмрэ зэрызыщагъэпсэхунум и мызакъуэу, а щIыпIэм деж щыт егъэджэныгъэ, спорт IуэхущIапIэхэм екIуу хэзэгъэнущ паркыр, къалэм и теплъэр иригъэфIэкIуэнущ.
ТекIуэныгъэм и паркыр гъэхьэзырыным иужь ихьэнущ мазаем и 23-м, ар фокIадэм яухыну хуагъэфащэ.
Зыхуей хуагъазэ щIыпIэхэм ящыщщ Идарым и цIэр зезыхьэ уэрамри. Абы зы жэщ-махуэм ирикIуэ машинэм я бжыгъэр мин 30 мэхъу. Ар федераль-нэ мыхьэнэ зиIэ гъуэгущ, зэзыгъэпэщыжыр «Кавказ» гъуэгу управле- нэрщ.
ДяпэкIэ елэжьынущ гъуэгубгъум ирикIуэ лъэс лъагъуэм, «Уафэ къабзэ» программэм къызэригъэувым тету. ФокIадэм и 1-м ирихьэлIэу зэфIагъэкIыну я гугъэщ.
Идарым и цIэр зезыхьэ уэрамым къыщыщIэдзауэ Осетинскэм нэс ирикIуэ псыхъуэри зыхуей хуагъэзэнущ зэман гъунэгъум.
