Гъатхэ губгъуэ лэжьыгъэхэм щIамыдзэ щIыкIэ «Урысеймэкъумэшбанкым» и къудамэу КъБР-м щыIэм республикэм и мэкъумэшыщIэхэм худэчых зыхэт кредиту сом мелуан 236-рэ мы гъэм яритынущ. Абы щыщу сом мелуан 73-м щхьэкIэ лъэIухэр къыIахакIэщ.
«Нэхъыбэу гулъытэ зыхуэтщIынур хьэрычэт IэнатIэ мащIэм, курытым хэтхэрщ. Урысей Банкым и ставкэ нэхъыщхьэр щылъагэ мы лъэхъэнэм дэ дыхущIокъу ди мэкъумэшыщIэхэм зэрыхъукIэ защIэдгъэкъуэну, зыпэрыт IэнатIэхэр ирагъэфIэкIуэн пап-щIэ дадэIэпыкъуну, я лэжьыгъэхэр ядэдгъэпсынщIэну.
Къэбэрдей-Балъкъэрми ди къэралми я экономикэхэм заужьыным и шэсыпIэщ худэчых зыхэт кредитхэр щIыпIэ АПК-хэм етыныр», - жиIащ «Урысеймэкъумэшбанкым» и къудамэу КъБР-м щыIэм и унафэщI Сокъур Алим.
2024 гъэм Банкым и щIыналъэ къудамэм республикэм и мэкъумэш IэнатIэм щIыхуэу сом мелуан 983-рэ иритащ, абы щыщу сом мелуан 280-р худэчых зыхэт кредитхэм хуэдэу. 2023 гъэм щыIа бжыгъэхэм ебгъапщэмэ, зэрызэкIэлъыкIуэм хуэдэу, процент 36-кIэ, 20-кIэ абыхэм хэхъуащ. Зэрыхудачых хабзэм тету кредиту сом мелаун 305-рэ нэгъабэ щIыхуэу итащ губгъуэ лэжьыгъэхэр иризэфIагъэкIын папщIэ.
Апхуэдэуи Банкым и щIыналъэ къудамэм и дэIэпыкъуныгъэкIэ «Налшык и жыг хадэхэр» IуэхущIапIэм и инвестицэ пэхуэщIэшхуэ 2024 гъэм ирагъэжьащ. Ар хуэунэтIащ зэуэ пхъэщхьэмыщхьэ тонн 5300-рэ зыщIэхуэ хъумапIэ ухуэным. Абы ахъшэу хуаутIыпщы-нум и процент 75-р «Урысеймэкъумэшбанкым» ейщ.
ХъумапIэр лажьэу ирагъэжьэну я мурадщ мы гъэм и япэ мазищым къриубыдэу. Иджыпсту лэжьыгъэм и процент 97-р зэфIэкIащ. Пхъэщхьэмыщхьэ хъумапIэр здэщыIэр Шэджэм щIыналъэрщ икIи ар лажьэу ирагъэжьа нэужь цIыху 30-м щIигъум лэжьапIэ иратыфынущ.
Къыхэдгъэщынщи, «Налшык и жыг хадэхэр» IуэхущIапIэмрэ «Урысеймэкъумэшбанкымрэ» зэдэлэжьэн щIадзащ 2019 - 2020 гъэхэм. ИкIи абы щыгъуэ жыг хадэщIэ ягъэтIысащ - жыгыщIэ 546210-рэ гектари 150-м хагъэзэгъащ. Пхъэщхьэмыщхьэ къехьэлIэжыгъуэм деж илъэс къэс цIыху 250-м нэблагъэ лэжьыгъэкIэ абы къыщызэрагъэпэщ.
ХЬЭЩЫКЪУЕЙ Олег.
