Мазаем и 3 - 7-хэм Каменномост (Къармэхьэблэ) курыт еджапIэ №2-м щекIуэкIащ щIэныгъэм и тхьэмахуэ. ЕгъэджакIуэхэмрэ еджакIуэ­хэмрэ папщIэ ар гъэщIэгъуэнрэ купщIафIэу къызэрагъэпэщащ.

ЩIэныгъэм и тхьэмахуэр щхьэусыгъуэфI хъуащ дерсхэр нэхъри щIэщыгъуэу, къэхутэ­ныгъэхэр хэту егъэкIуэкIыным, зэфIэкI зиIэ ­сабийхэм зыкъызыкъуегъэхыным теухуауэ. Курыт еджапIэм а махуэр ще­кIуэ­кIащ «ЩIэ­ныгъэр къарущ» къыхуеджэныгъэм щIэту.         1 - 11-нэ классхэм дерс зэIухахэр щатащ. Еджа­кIуэхэм щIэщыгъуэ куэд къащIащ республикэм и щIэныгъэлIхэм, тхыдэджхэм, тхакIуэ-усакIуэхэм ятеухуауэ. Iыхьэ щхьэхуэ ­хухахащ къуажэм и пщIэр зыIэта цIыху щэджащэ­хэм ятеухуа тхыгъэхэр гъэхьэзырыным. Абыхэм куэду яхэтщ етIуанэ курыт еджапIэр къэзыухахэри. ГъэщIэгъуэну екIуэкIащ «КъэхутакIуэ нэхъыфI» зэпеуэр, «ДжэгукIэхэмкIэ щIэныгъэм дыхуокIуэ», «Таурыхъхэм я дунейм», «Грамматикэ нэжэгужэ», «Псэущхьэхэм я дунейр» дерс зэIухахэр. Класс къэс ягъэхьэзыращ щIэныгъэлI цIэрыIуэхэм ятеухуа блын ­газетхэр. 
ЕгъэджакIуэхэмрэ еджакIуэхэмрэ ягури я псэри етауэ бгъэдыхьащ щIэныгъэм и тхьэмахуэр щIэщыгъуэу къызэгъэпэщыным. ЩIэныгъэм и дунейр зэрыкъулейр, абы куэдрэ узыгъэпIейтей упщIэхэм я жэуапхэр къызэры­щыбгъуэтыфыр, еджэнымрэ къэхутэнымрэ я гъуэгур зэрыбгъуфIэр хьэкъыу я фIэщ хъуащ еджакIуэхэм. 

ГУГЪУЭТ  Заремэ.