Бюгюн КъМР-ни Башчысы Казбек Коков Жаш тёлюню ишлери жаны бла федерал агентствону оноучусу Григорий Гуров бла эм «Биринчилени атламлары» деген битеуросей жамауат-къырал сабий эм жаш тёлю биригиуню таматасы Артур Орлов бла тюбешгенди. Аны юсюнден ол кесни телеграм-каналында билдириу этгенди.

«Бизге келген сыйлы къонакъла жаш тёлю политика бла байламлы бардырыллыкъ бир къауум магъаналы мероприятиягъа къатышырыкъдыла. Бизни башламчылыкъларыбызгъа, ол санда «Регионну жаш тёлюге» деген федерал программагъа эс бургъанлары ючюн Григорий Александровичге бла  Артур Валерьевичге ыразылыгъымы билдиргенме. Бир ай мындан алгъа Москвада тюбешгенибизде жаш тёлю бёлюмде ишлеген оноучуланы Къабарты-Малкъаргъа чакъыргъан эдим, кёресиз ала бери келдиле.

Бек ышанама, быллай тюбешиуле байламлыкъланы кючлерге болушурукъларына. Къабарты-Малкъар федерал проектлени бардыргъанда энчи кезиулерин ётдюрюрге къатышыргъа боллукъду, ол санда волонтерла бла болушлукъ эте. Биз социал магъаналы проектлени жашауда бардырыу жаны бла сорууланы сюзгенбиз. Аслам эсни волонтер къымылдауну айнытыугъа, жаш тюлюню арасында байламлыкъланы кенгертирге, юйюр  туризмге эс бурургъа эмда алгъындан келген тёрелени кючлерге кереклисини юсюнден сёлешгенбиз.

Ол жумушланы жашауда бардырыугъа регионда жаш тёлю араланы къурау себеплик этерикди. Аланы муниципалитетледе къуралгъан бёлюмлеринде сабийле эмда жаш тёлю бла ишни тийишлисича бардыргъаныбызгъа, жаш тёлю бла ишлерик адамланы юйретгенибизге бийик багъа берилгенди.

 Ата журтну къоруулаучуну жылында аслам эс аскер-патриот «Жигитлени тёлюсю», «Зарница 2.0.». проектлени бардырыргъа буруллукъду.

Бюгюнлюкде къыралда Уллу Ата журт урушда болдургъан Хорламны 80 жыллыгъын белгилеу бла байламлы хазырланыу ишле башланнгандыла.   Хорламны волонтерлары ол заманлада Къабарты-Малкъарны халкъы болдургъан жигитликни унутмаугъа, тарых  магъаналы, ол санда бушуулу ишлени да эсде тутуугъа тири къатышадыла. Жаш тёлюге ол магъаналы затланы юйретиуге бизни шёндюгю жигитлерибиз, энчи аскер операциягъа къатышхан ветеранла да болушадыла»,- деп айтылады билдириуде.