Ата журтну къоруулаучусуну жылыны чеклеринде республиканы окъуу юйлеринде тюрлю-тюрлю жумушла бардырыладыла. Хасанияны 16-чы номерли орта школунда да анга жораланып тюбешиу къуралгъанды. Окъуучулагъа къонакъгъа энчи аскер операциягъа къатышып къайтхан ветеранла келгендиле: Роман Коваленко, Ахмед Пшихачев эмда Заурбек Мазлоев.
Къонакъла аскер къуллукъларыны, энчи аскер операцияда борчларыны юслеринден хапарлагъандыла. Бюгюннгю аскерчи къарыулу, саулукълу болуу бла чекленип къалмай, терен билимли болургъа, къыйын кезиуледе терк окъуна амал таба билирге, усталыгъын дайым ёсдюрюрге кереклисин чертип айтхандыла.
Школчула бла тюбешиуню «Ата журтну къоруулаучулары» къырал фондну регион бёлюмюню башчысыны орунбасары Къумукъланы Зульфия къурагъанды. Тюбешиу керти да эсде къалырча болгъанды. Аскерчи жашла биргелерине къоруулаучуну кийимлерин да келтиргендиле. Аланы школчу къызла бла жашла юслерине кийип кёргендиле.
Мектепни директоруну окъутуу иш жаны бла орунбасары Холамханланы Юля Хасымовна, къонакълагъа ыразылыгъын билдире, ала бла республикабыз ёхтемленнгенин чертгенди. «Сизни юлгюгюзде ёсюп келген тёлю чынтты жигитле арабызда жашагъанларын кёредиле, биледиле. Кишилик, батырлыкъ, Ата журтха сюймеклик баш адамлыкъ шартла болгъанларына тюшюнедиле. Биз Ата журтубузну жалынчакъсызлыгъы ючюн къазауат эте тургъан жашларыбыз жууукъ заманда хорлам бла сау-саламат къайтырларын ашыгъып сакълайбыз. Бизни элден да бардыла СВО-да къуллукъ эте тургъан жашла. Жарсыугъа, аладан бири – Кючменланы Таубий – жигитча сермеше ёлгенди. Ол Кишиликни ордени бла саугъаланнганды. Аллай жашларыбыз бла ёхтемленебиз»,-дегенди.
Директорну кенгешчиси Улбашланы Джамиля уа, къонакълагъа ыспас эте, школчула мындан ары да аскерчиле бла тюбеше турургъа сюйгенлерин, аланы хапарларына сюйюп тынгыларыкъларын айтханды.
Тюбешиуню кезиуюнде школчула къонакълагъа сорууларын бергендиле, саугъалагъан да этгендиле, биргелерине суратха да тюшгендиле.
Холаланы Марзият
