Къэбэрдей-Балъкъэрым гуманитар щIэныгъэхэмрэ техникэмкIэ и колледжыр (КБГТК) IэщIагъэ щрагъэгъуэт еджапIэхэм ящыщу нэхъыфIу къалъыта IуэхущIапIитхум языхэз зэрыхъуам теухуа хъыбар иджыблагъэ къатащ.
УФ-м ЕгъэджэныгъэмкIэ и министерствэм и интернет-напэкIуэцIым зэритымкIэ, щIыналъэхэм IэщIагъэ щрагъэгъуэт я IуэхущIапIэхэм ящыщу зи узыншагъэмкIэ сэкъат зиIэхэм щIэныгъэ егъэгъуэтыным, ахэр иужькIэ лэжьапIэкIэ къызэгъэпэщыжыным хуэунэтIауэ лэжьыгъэшхуэ зэфIегъэкI Къэбэрдей-Балъкъэрым гуманитар щIэныгъэхэмрэ техникэмкIэ и колледжым. КъулыкъущIапIэм иригъэкIуэкIа кIэлъыплъыныгъэхэм япкъ иткIэ, 2022 гъэм елъытауэ, колледжым Iуэхугъуэ 16-кIэ рейтингым зыкъыщиIэтащ, хуэдэ IуэхущIапIи 139-м япэ ищащ.
НэхъапэкIэ «Адыгэ псалъэ» газетым и щIэджыкIакIуэхэм хъыбар зэредгъэщIащи, зи узыншагъэмкIэ сэкъат зиIэ ныбжьыщIэхэр егъэджэнымкIэ колледжыр Iэмал зэмылIэужьыгъуэхэр зэзыгъэпэщ егъэджэныгъэ-щIэныпхъэ центр хъуащ. А центрым и къалэнхэр колледжым щигъэзащIэр Къэбэрдей-Балъкэрым и закъуэкъым, атIэ ар ядолажьэ Къэрэшей-Шэрджэсым щыIэ, зи узыншагъэмкIэ сэкъат зиIэхэм IэщIагъэ щрагъэгъуэт IуэхущIапIэхэм. Апхуэдэ центру къэралым 46-рэ иту аращ.
А центр 46-м ящыщу Къэбэрдей-Балъкъэрым щыIэм 11-нэ увыпIэр иIыгъщ, 2022 гъэм еплъытмэ, IуэхугъуиплIкIэ рейтингым зыкъыщиIэтащ. Къыхэгъэщын хуейщ, зи гугъу тщIы центрым и къалэн нэхъыщхьэр зи узыншагъэр зэмыпэщ, зи IэпкълъэпкъкIэ сэкъат зиIэхэм щIэныгъэ нэхъыщхьэ зрагъэгъуэтыфыну Iэмал зэрыщыIэр ялъэгъэIэсыныр икIи тегъэгушхуэныр, иджырей технологиехэмрэ щIэныгъэм щыубзыхуа хъуа щIэныпхъэхэмкIэ IэщIагъэрэ есэныгъэ пыухыкIахэмрэ зыхагъэгъуэзэфыну зэрыщытыр.
«Колледжым зыIэригъэхьа ехъулIэныгъэхэр къызыхэкIыр абы и лэжьакIуэхэр зэгурыIуэу зэрызэдэлажьэрщ, узыншагъэр и щхьэусыгъуэу щытыкIэ гугъум ит щIалэгъуалэм гууз-лыуз хуаIэу, абыхэм я зэфIэкIыр жылагъуэм зэрещхьэпэнум фIэщхъуныгъэ хуаIэу зэрыщытырщ», – щыжеIэ къулыкъущIапIэм кърагъэува хъыбарым.
Апхуэдэ ехъулIэныгъэ зиIэ щIыналъэ колледжым нэхъри хигъэхъуэну, и зэфIэкIхэри цIыхум ещхьэпэу куэдрэ лэжьэну ди гуапэщ.
ШУРДЫМ Динэ.
