«Хэкум и хъумакIуэхэр» щIыналъэ фондым и унафэщI Дадэ МуIэед зригъэлъэгъуащ фондым и ­къудамэу Шэджэм районым щыIэр и лэжьыгъэм зэре­хъулIэ щIыкIэр, щитхащ и телеграм-каналым щIыпIэ администрацэм и тхьэмадэ Борсэ Юрэ. 

2024 гъэм щегъэжьауэ фондым и къудамэр хэплъащ абы зэрызыкъыхуагъэза лъэIу зэмылIэужьыгъуэу 600-м щIигъум. Ахэр нэхъыбэу ехьэлIат социальнэ, психологие, медицинэ, юрист дэIэпыкъуныгъэхэр дзэ Iуэху хэхам хэтахэмрэ я уна­гъуэхэмрэ ягъэгъуэтыным, СВО-м зэрыщыIам щыхьэт те­хъуэ тхылъыр (удостоверенэр) къыдахыным, къыхуащIэ псэупIэ-коммунальнэ Iуэхутхьэбзэхэм щIатын хуей пщIэм зэрыхудачых Iэмалхэр яхухэлъхьэным, зауэ зэпэщIэувэныгъэм щагъуэта фэбжьхэр санаторэхэмрэ курортхэмрэ щагъэхъужын папщIэ, абыхэм я путевкэхэмкIэ къызэгъэ­пэщыным, нэгъуэщI Iуэху куэдми. 
Дэтхэнэ зы цIыхум и лъэIуми щIыпIэ администрацэм щыхоплъэ, хэкIыпIэхэр къыхуалъыхъуэ икIи, япэ ахэр ирагъэщу, нэхъ псынщIэу зэфIэха зэрыхъуным яужь ит зэпытщ.
«Дэ адэкIи тлъэкI къэдгъэнэнукъым къэралыр щытыкIэ гугъум щихуа дакъикъэм абы и шынагъуэншагъэр къызэрагъэпэщу къуэувахэм сыт и лъэныкъуэкIи дадэIэпыкъун папщIэ», - жиIащ Борсэ Юрэ. 

ХЬЭЩОКЪУЭ Алыдж.