Бу ыйыкъда, 27 январьдан 2 февральгъа дери, Россейни Саулукъ сакълау министерствосу наркотиклени жайылыууна къажау жумушла бардырады. Бу уу адамны санларына, психикасына уллу заран салгъаны белгилиди, алай, анга да къарамай, аны ичип кёрюрге сюйгенлени саны энтта уллуду.

КъМР-ни Саулукъ сакълау министерствосуну Психиатрияны бла наркологияны республикалы клиника арасыны врачы психиатры-наркологу Умар Чапанов бизге айтханыча, наркотикле бири къалмай барысы да уулудула, ала адамны битеу санларына заран саладыла. Бютюнда   адамны жюрек-къан тамыр системасын бузадыла.  Аны хатасындан а гипертония,  брадикардия,  аритмия, инфаркт, къан чабыу дегенча ауруула  башланадыла.

- Наркотиклени къан тамырлагъа укол этип ичген кезиуде адамны баууру бузулады, цирроз къысха заманны ичинде башланады.  Аны бла бирге адамны санларында кальций терс жайылады. Аны хатасындан наркоманны сюеклери иничгередиле,-дейди Умар Вахаевич.

Санларын ууландыргъан бла бирге психикада тюрлениуле башланадыла. Адамны хали тюрленеди, психоз болады, эсин тас этерге къоркъуула уллудула. Умар Чапанов айтханыча, наркоманны акъылы   тозурайды, ол адамлыкъ ышанларын тас этеди.

- Не саулукълу болса да, наркоман он жылдан кёп жашамайды. Аланы 95 процентине ВИЧ, гепатит неда сифилис жугъады.  Бу аруула уа наркотикден да терк бузадыла адамны саулугъун,-дейди нарколог.

Андан сора да, ууну оздуруп ичген кезиуле да асламдыла. Ол заманда адамны ёлюмден къутхаргъан а бек къыйынды.

 - Тарихлеге кёре, бир наркоман жылны ичинде кесини ызындан 5-17 адамны тартады бу осал ишге. Сизге танышыгъыз  наркотикни, уулу  дарманны ичип кёрюрге чакъыра эсе, унамагъыз,  жашауугъузгъа, саулууугъузгъа къаллай уллу хата салынырыкъны юсюнден сагъыш этигиз. Танышларыгъызны, жууукъларыгъызны арасында наркотик  ичген  бар эсе,  мычымай врачха барыргъа керекди. Бу аурууну адам кеси аллына хорлаяллыкъ тюйюлдю, бизни арада уа билимли, сынаулу врачла кёпдюле,-дейди ушагъыбызны ахырында Умар Чапанов.

Тикаланы Фатима.