2024 гъэм къриубыдэу, республикэм и цIыхухэм газ зэрырикIуэ бжьамийхэм зыпащIэнымкIэ «Газпром межрегионгаз Нальчик» ООО-м лъэIу тхылъу 3752-рэ Iэрагъэхьащ. Абы­хэм ящыщу 3681-м а IуэхущIапIэм зэгурыIуэныгъэ ирищIылIащ, лъапсэ 3383-м газыр иришэлIащ. Къи­нэ­мыщIауэ, лъапсэ 1901-м газыр я лъапсэм хурашэлIащ, унэм езыхэм щIашэжын хуейуэ. «Социальная газификация» Iэмалыр къагъэсэбэпу, КъБР-м ПромышленностымкIэ, энер­гетикэмрэ сату Iуэху­хэмкIэ и министерствэм, республикэм и бюджетым къыхэкIыу, сом мин 815,2-рэ тригъэкIуэдащ зыдэIэ­пыкъупхъэу къалъытахэм.

Федеральнэ проектым тету, электро-транспорт лIэу­жьыгъуэщIэр къагъэсэ­бэпыфын хуэдэу, республикэм и щIыналъэхэм щIыпIэ-щIыпIэкIэрэ электро-заряднэ станцу 22-рэ щагъэуващ. А Iуэхум хуэгъэзауэ республикэм и бюджетым къыхаха сом мелуан 38-р, къанэ щымыIэу, зэхьэлIапхъэм трагъэкIуэдащ.
Къэбэрдей-Балъкъэрым и гъэсыныпхъэ-энергетикэ IуэхущIапIэм и IэнатIэхэр шы­нагъуэншэу щыгъэты­ным теухуауэ щекIуэкI кIэ­лъы­плъыныгъэхэм щыпащэ. А Iуэхум хузэщIагъэуIуа комиссэхэм, псори зэхэту 32-м, я лэжьыгъэм хэтщ КъБР-м ПромышленностымкIэ, энер­гетикэмрэ сату IуэхухэмкIэ и министерствэм и лIы­кIуэхэри.
2024 гъэм энергетикэм пыщIа Iуэхухэм ехьэлIауэ цIыху щхьэхуэхэми зи гугъу тщIы министерствэм зыхуа­гъэзащ. Абыхэм ящыщу ­200-м арэзы къэзыщI жэуап­хэр къаIэрыхьэжащ. 
Аруан районым хыхьэ Псыгуэнсу къуажэм деж щаухуэ «Шэрэдж ГЭС» электростанцым ехьэлIа Iуэхухэр и кIэм нагъэблэгъащ. Бетон лэжьыгъэхэр зэфIагъэкIащ, аг­ре­гат­хэр щагъэуващ, киловольти 110-рэ къэзыт трансформаторыр здэщытыпхъэм ­деж щызэпкъралъхьащ, Iэмэ­псы­­мэ псори къызыхуэ­тыншэу зэрырагъэжьэным хуагъэхьэзыр, Iэгъуэблагъэр ягъэдахэ. 

КЪУМАХУЭ  Аслъэн.