КъМР-ни Эл мюлк министерствосундан билдиргенлерича, быйылгъы жыл башланнганлы 5 минг гектар чакълы жерде мелиорацияны  хайырланырча болгъанды. Ол санда «Агропромышленный комплексни продукциясыны экспорту» регион эм  «Халкъла аралы  кооперация эм экспорт»  миллет проектлеге кёре 1,4  эм «Хайырланыннган эм эл мюлк жерлеге бёлюннген жерледе   комплекс халда  мелиорацияны хайырланыу" федерал проектге кёре да - 3,7 минг гектар.  

Сагъынылгъан ишле Прохладна, Бахсан, Лескен, Май эм Терк районлада тамамланнгандыла. Аны чеклеринде  жауун  эм тамычы халда сугъарырча амал этилгенди.

Къыралны жанындан  болушлукъ тапдырылгъаныны  хайырындан, жыл сайын арендаторла жауун  эм тамычы халда сугъаргъан  оборудованияны  алыргъа онг табадыла. Ол агропромышленный  комплексни айнытыуда болмагъанча  магъаналыды.  Аны кенг  хайырланыу тюрлю-тюрлю ёсюмлюкледен бай тирлик алыргъа эмда иги кесек  файда тюшюрюрге  себеплик этеди.

Сёз ючюн, сугъарылгъан  жерледен эки кере тирлик алыргъа жарайды.   Кюзлюкледе тирликни кетергенлеринден сора экинчи кере мирзеуге бла силосха нартюх, къара будай, соя  эм  башха битимле саладыла.