«Адыгэ псалъэ» газетым и хьэщIэщым къеблэгъащ Налшык дэт гимназие №14-м и унафэщIым гъэсэныгъэ IуэхухэмкIэ и къуэдзэ Султановэ Саймэ, и гъэсэнхэр - 6-нэ классым щеджэ ныбжьыщIэхэр - щIыгъуу. Гимназием блыщхьэ къэс щрагъэкIуэкI «Псалъэмакъ щхьэпэхэр» дерсхэм ящыщ зы траухуащ Урысейм и печатым и махуэм.
КъБР-м и Журналистхэм я зэгухьэныгъэм и унафэщI, «Адыгэ псалъэ» газетым и редактор нэхъыщхьэ Жыласэ Заурбэч ныбжьыщIэхэм яхутепсэлъыхьащ газетыр нэхъ пасэм къызэрыдэкIыу щыта щIыкIэм, иджыпсту абы игъуэта зыужьыныгъэм, адыгэ газетым и фIэщыгъэм зэманым елъытауэ зэрызихъуэжам, нэгъуэщIхэми. ХьэщIэхэм яригъэлъэгъуащ «Адыгэ псалъэм» и музейм щIэлъ хьэпшыпхэр: «Кавказская коммуна» пасэрей газетым и къыдэкIыгъуэ зыбжанэ, тхыгъэхэр зэрытрадзэу щыта машинэ лIэужьыгъуитI, «Адыгэ псалъэм» и къыдэкIыгъуэ зэмылIэужьыгъуэхэр, газетыр традзэн папщIэ къагъэсэбэпу щыта хьэпшыпхэр: гъущI линейкэхэр, хьэрфыпкъхэр, дискетэхэмрэ дискхэмрэ. Редактор нэхъыщхьэр къытеувыIащ мы зэманым газетым зэрелэжь, къызэрыдагъэкI щIыкIэхэмрэ Iэмалхэмрэ, редакцэр къудамэ-къудамэу зэрызэхэтым, журналистхэм я гуащIэм, техническэ лэжьакIуэхэм я къалэнхэм. ЖиIащ газетым электрон щытыкIэ иIэу къызэрыдэкIри, телеграм каналым «Адыгэ псалъэм» напэкIуэцI зэрыщигъэлажьэри.
«Адыгэ псалъэ» газетым и редактор нэхъыщхьэм и къуэдзэ Ширдий Маринэ еджакIуэхэр къыхуриджащ анэдэлъхубзэм пщIэ хуащIыну, ирипсэлъэну, я бзэмкIэ къы-дэкI «Нур» журналыр традзэ-ну, адыгэ газетым ныбжьэгъу хуэхъуну.
- Адыгэм и щэнхабзэм, и тхыдэм, и хабзэм зыщывгъэгъуазэ иджы щыщIэвдзи. Пасэу а псом фыдихьэхмэ, фи гупсысэм зиужьынущ. Абы икIи фыщыгуфIыкIыжынущ. АдыгэбзэкIэ ятххэм феджэ зэрыхъукIэ. Рассказ цIыкIухэр, новеллэхэр, усэхэр куэду щыIэщ. Ди IуэрыIуатэ къудейр сыт и уасэ, Iущыгъэ къыхэпхынумэ! - жиIащ абы.
«Адыгэ псалъэм» и сурэттех Къарей Элинэ ныбжьыщIэ-хэм яхутепсэлъыхьащ газетым и фIагъыр, и купщIэр, и теплъэр абы сурэтыр зэрыхэувэм зыкъомкIэ зэрелъытам.
- Газетыр къызэIупха нэужь, япэу гу зылъыптэр ар зэрыгъэпсамрэ тхыгъэхэм кIэщIэт сурэтхэмрэщ. Хъыбарым, тхыгъэм е зэпсэлъэныгъэм укъемыджэ щIыкIэ абы къыщыхьа сурэтым ухуигъэхьэзырын хуейщ ар зытеухуам. Куэд мэхъу сурэттехымрэ журналистымрэ зытетхыхьри къагъэлъагъуэри. Драгъэблагъэ къулыкъущIэхэм я зэIущIэхэм, концертхэм, театрхэм, курыт еджапIэхэмрэ сабий садхэмрэ къыщызэрагъэпэщ пшыхьхэм, библиотекэхэмрэ музейхэмрэ щекIуэкI зэIущIэхэмрэ гъэлъэгъуэныгъэхэмрэ. Элинэ къытеувыIащ и лэжьыгъэ Iуэхум нэмыщI дэзыхьэххэм. Езыр къэлътмакъ гъэщIэрэщIахэр, тхьэгъухэр зыщI IэпэIэсэщ. Абы гухэхъуэгъуэ къезыт Iуэхугъуэщ бжэхэмрэ щхьэгъубжэхэмрэ сурэт трихыныр. ЗэрыжиIэмкIэ, абыхэм я щытыкIэм куэд къаIуатэ, къалэр зыхуэдэм деж къыщегъэжьауэ унэм щыпсэу цIыхухэм я дунейр зыхуэдэнкIэ хъунум щыщIэкIыжу. Сурэттехым къэрал куэд къызэхикIухьащ, апхуэдэу щыхъукIэ бжэ куэди «къызэIуихащ».
Ялъэгъуахэмрэ зэхахахэмрэ итхьэкъуауэ ныбжьыщIэ-хэр зэбгрыкIыжащ. Хэт ищIэн журналист IэщIагъэм и къэкIуэнур зэлъытахэри абыхэм къахэкIынкIи хъунщ.
ГУГЪУЭТ Заремэ,
Сурэтыр Къарей
Элинэ трихащ.