Бахъсэн къалэм и администрацэм и унафэщI Мамхэгъ Хьэчим иджыб­лагъэ яIущIащ щIыпIэ спорткомитетым и унафэщI Къаскъул Аслъэн, Щауэ Iэхьед и цIэр зезыхьэ спорт еджапIэм и директор Къарэмышэ СулътIан, тренер Жамырзэ Беслъэн, спортсмен цIэрыIуэхэу Багъ Алийрэ Мэш Ислъамрэ.

Багъымрэ Мэшымрэ зэIущIэм щы­тепсэлъыхьащ къапэщылъ зэIущIэхэм зэрызыхуагъэхьэзыр щIыкIэм­рэ дызыхыхьа илъэсым зэхуагъэувыжа къалэнхэмрэ. Абыхэм я псалъэм пэджэжу Жамырзэ Беслъэн къызэ­хуэсахэр щигъэгъуэзащ зэзауэ зыхэт спорт лIэужьыгъуэхэмкIэ (ММА) зыкъэзыгъэлъагъуэ спортсменхэм я Iуэхур нобэкIэ зыIутым, ахэр адэкIэ кIуэта зэрыхъуным. 
ММА-м хэт спортсменхэм иужьрей илъэсхэм зыщагъэхьэзырар Щауэм и цIэр зезыхьэ спорт еджапIэрщ. Иджы абыхэм пэш щхьэхуэ хухахащ икIи зэгъэпэщыжыныгъэ лэжьыгъэхэр иджыпс­ту щрагъэкIуэкI. ИужькIэ зы­хуей-зыхуэфIхэмкIэ пэшыр «яхуэпэнущ». Абы къыдэкIуэу, тренерхэмрэ егъэджакIуэхэмрэ я бжыгъэми хагъэхъуэнущ.
«Зэзауэ зыхэт спорт лIэужьыгъуэхэм иджыпсту щIэупщIэшхуэ дуней псом щаIэщ. Абы хэт спортсменхэр щагъэ­хьэзыру къэралым щыIэ и центрхэм яхэтщ Бахъсэн къалэр. ИкIи тлъэкI къэдгъанэркъым апхуэдэ пщIэр нэхъ лъагэу тIэтын папщIэ. Мырзэкъан Азэ­мэт, Багъ Алий, Бырхьэм Мухьэмэд, КIуэкIуэ Мухьэмэд, Мэш Ислъам, Гугухэ Ислъамрэ Муратрэ, Хъыжьрокъуэ Валерэ, Балъкъыз Ахьмэд, Хъуэтхэ Резуанрэ Залымрэ, Щоджэн Артур сымэ, нэгъуэщIхэри къыдэкIуэтей ди щIэблэм я щапхъэщ икIи я гъуазэщ», - жиIащ Мамхэгъ Хьэчим. 
Тамокъуэ Алыдж.