Къабарты-Малкъарда жер-жерли администрацияла бла къысха байламлыкъ жюрютюлгенини хайырындан, арт жыллада республикалы магъаналы жолла жангы мардалагъа келиширча уллу иш этиледи, деп билдириледи КъМР-ни Транспорт эмда жол мюлк министерствосуну пресс-службасындан.

Алай бла былтыр регионал жол мюлк фонддан тынгылы ремонт ишлеге бир миллиард сомдан аслам бёлюннгенди. Аны хайыры бла муниципалитетлени кёбюсюнде  36 километр чакълы  бирде 31 жол жангыртылгъанды.  

Ол санда   Басханда Гагарин атлы жангы  мектепге баргъан жол ишленнгенди. Аны бла бирге Баксанов атлы орамда да тротуарла салып  эм  башха жумушланы  тамамлап кюрешедиле. 

Чегем районда да   Кярова бла  Шогеновла атлы орамлагъа тынгылы ремонт этилгенди.   Прохладна районда  Красносельское  элде жангы школгъа баргъан жол  жангыртылгъанды. Прохладный  шахарда да 4,2 километр тенгли бирде Промышленный орамны игилендирирча  тийишли ишле бардырылгъандыла.

Май районда 2,5 километрде   Железнодорожная, Грибоедова эм  Совхозная орамлагъа тынгылы ремонт этип, тап халгъа келтириргендиле. 

 Черек районну юсюнден айтханда да,   Бабугентде, Къашхатауда эм  Аушигерде социал магъаналы орамла мардалагъа келиширча болгъандыла.  Тырныауузда да  Мусука улу орамгъа къаралгъанды.
 Золск районда 4,2 километр чакълы бирде Ленин атлы орамны жангыртхандыла.

Андан сора да, «Эл жерлени комплекс халда айныту" федерал  программагъа кёре,  Псыхурейде 6 километрден артыкъда жети  эм  Кахунда бир жолгъа тынгылы ремонт этилгенди.  

Эсге сала айтсакъ, тынгылы ремонт ишле адамлгъа тап болурча  социал магъаналы орамлада бардырыладыла.  Алада  мектепле, сабий садла,  амбулаторяла,  спорт комплексле эм башха объектле да  орналадыла. 

Жыл сайын шахарлада бла  элледе  жол  инфраструктура  игилендирилирча аслам эс бурулады.  Аны баш магъанасы адамланы  болумларын игилендирирге эм транспорт тыйгъычсыз жюрюрча этергеди.   

Бизни корр.