Быйыл жылны ортасында Псыгансу элни къатында Гитче Черек ГЭС хайырланыргъа берилликди.  Ол бир атлы сууну къатында ишленнгенди эм  Къашхатау, Аушигер эм Зарагиж гидроэлектростанциялача  Тёбен-Черек каскадха кирликди.

Бу станциягъа суу Зарагижде ГЭС-ден 1,8 - километрлик арыкъ бла келеди. Ызы бла ГЭС-ни мекямы орналады. Анда 110 кВ ток берген гидроагрегатла,  электротехника эм башха оборудования да орналады. Ала  бизни къыралда чыгъарылгъанладыла.  Бусагъатда аны сынау халда  ишлетип башларча жумушланы тамамлайдыла эм   тёгерек башын   айбатландырырча да  мадар  этиледи.  

Объектни проектин РусГидрогъа кирген «Гидропроект» институтда хазырлагъандыла. Быйыл жылны ортасына объектни къурулушу бошалгъандан сора, ол   къырал экспертизаны ётерикди эм хайырланыргъа берилликди.   

Эсге сала айтсакъ, бюгюнлюкде   РусГидро биригиуню Къабарты-Малкъарда бёлюмюне сегиз  гидроэлектростанция киреди.  Саулай алып айтханда, ала  155,7 МВт ток бередиле. Жангы гидроэлектростанция ишлеп башласа, республиканы  ток бла жалчытыуда, ол санда экономиканы айнытыуда да  ахшы къошумчулукъ этерикди.