Антарктидэ жыжьэм къикIыу хъыбар гуапэ иджыблагъэ къытIэрыхьащ. Адыгэ пщащэ, Урысей Федерацэм и мызакъуэу дуней псом цIэрыIуэ щыхъуа альпинисткэ хахуэ Пекъу Алинэ иджыри зы лъагапIэщIэ мы махуэхэм къищтащ. ЩIышылэм и 8-м, езыр къыщалъхуа махуэм, ар дэкIащ Антарктидэм и нэхъ лъагэ дыдэм - Винсон (метр 4892-рэ) къурш уэсылъэм.
«ЛъагапIэшхуэтэкъым, ауэ Антарктидэм щынэхъ гугъур щIыIэ гущIэгъуншэрщ. А махуэм дунейр къыдэхъулIащ, дыгъэпст, къуршым и щхьэ дыдэм къыщытхузэIуихащ гур зытхьэкъу щIыпIэ дахэхэр», - жиIащ Алинэ.
ЩIы хъурейм и континентиблым я къурш нэхъ лъагэхэм я щыгум дэкIыным ехьэлIауэ щыIэ «ЛъагапIибл» программэм ипкъ иткIэщ Алинэ Антарктидэм зэрыкIуар. ИджыпстукIэ адыгэ бзылъхугъэм хузэфIэкIащ абыхэм ящыщу тхур къызэринэкIын, Винсонри яхэту, къыхуэнэжар Океанием щыIэ Джаемрэ Америкэ Ищхъэрэм и Денали къуршымрэщ.
Фигу къэдгъэкIыжынщи, Пекъум Антарктидэм зыхуигъэхьэзырын щIидзащ 2024 гъэм дыгъэгъазэм и 18-м.
«Сэ иджыпсту Чилим и Пуанта-Аренас къалэм сыщыIэщ. Къыспэщылъ гъуэгуанэм сыхуэхьэзырщ. Дыгъэгъазэм и 18-м Антарктидэм и Юнион Глетче щIыпIэм сылъэтэнущ. Абы зыщызгъэхьэзырынущ икIи дунейм и щытыкIэм Iэмал къыдитыху дыпэплъэнущ. ИужькIэ, 89-нэ градусым дылъэтэнущ (аращ зэреджэр ахэр къыщетIысэхыну щIыпIэм). АдэкIэ лыжэкIэ Полюс Ипщэм дыкIуэнущ. ИтIанэ Антарктидэм щынэхъ лъагэ дыдэ, Винсон къуршыр къыспэщылъщ. Ар си етхуанэ лъагапIэ хъунущ щIы хъурейм и континентиблым я къурш нэхъ лъагэхэм ящыщу», - яжриIащ Алинэ журналистхэм щежьэм щыгъуэ.
Алинэ и мурадхэр къехъулIэну, зыпэрыхьэ сыт хуэдэ Iуэхуми лъагапIэми нэсыну икIи и текIуэныгъэ дахэхэмкIэ, зэфIэкIхэмкIэ лъэпкъыр куэдрэ игъэгуфIэну дохъуэхъу.
ХЬЭЩЫКЪУЕЙ Олег.
