Дыгъэгъазэм и 13 - 15 махуэхэм Москва щекIуэкIащ къэрал лъэпкъ политикэм епхауэ къэув уп­щIэхэм теухуа урысейпсо семинар. Ар къызэригъэпэщащ «Урысейм ис лъэп­къхэм я ассамблее» урысейпсо жыла­гъуэ-къэрал зэгухьэ­ныгъэм икIи абы и къудамэхэм я тхьэмадэхэр щызэхуэсащ. ЛIыкIуэхэр ­къикIат Урысей Федерацэм и хэгъэгу 76-м. Ди республикэм къыб­гъэдэкIыу абы хэтащ Дунейпсо Адыгэ Хасэм и тхьэмадэ, «Урысейм ис лъэпкъхэм я ­ассамблее» зэгухьэныгъэм и Къэбэрдей-Балъкъэр щIыналъэ къудамэм и Iэтащхьэ Сэхъурокъуэ Хьэутий. Адыгэ Республикэм и лIыкIуэт Адыгэ Хасэм, зэгухьэ­ныгъэм и республикэ къудамэм я тхьэмадэ ЛIымыщэкъуэ Рэмэзан. 

Къызэхуэсахэр куэд зыгъэпIейтей, иджырей зэманым къигъэув Iуэхугъуэхэм тепсэлъыхьащ, жылагъуэ, къэ­рал лэжьакIуэхэр я гупсысэхэмкIэ, лэжьыгъэм и пIалъэкIэ зэчэнджэщащ, лъэпкъ зэхущытыкIэхэр нэхъри гъэбыдэным и хэкIыпIэхэр яубзыхуащ. 
Зэхуэсым и мыхьэнэм щытепсэлъыхьым, Сэхъурокъуэ Хьэутий жиIащ: «Сэ илъэс ещанэ хъуауэ сыхэтщ мыпхуэ-дэ зэIущIэшхуэм. КъыщаIэт Iуэхугъуэхэр куэдкIэ елъы-тащ дунейм къыщыхъу-къыщыщIэхэм. Дэ, ассамблеем и щIыналъэ зэгухьэныгъэхэм я тхьэмадэхэмрэ абы хэтхэмрэ, псом хуэмыдэжу дыщыгъуазэу щытын хуейщ ­къекIуэкI Iуэхугъуэхэм икIи ди пащхьэ къиувэ лъэпощхьэпохэм дыхуэхьэзыру щытыпхъэщ. Псом нэхъ щхьэпэр Iуэхум хэзыщIыкIхэм, IэщагъэлIхэм я гупсысэр къэдгъэсэбэпыфынырщ. Мис апхуэдэ Iущагъ куэд къыщыдощIэ семинархэм, хьэкъ тщохъу гъуэгу захуэ дызэрытетыр. Абы нэхъыбэм дытрегъэгушхуэ икIи гугъуехь псори къызэднэкIыу, текIуэныгъэр къызэрытхьынур ди фIэщ мэхъу. Урысейм ифI зыхэлъ, сэбэпынагъ къызыпэкIуэну Iуэхущ дэ зиужь дитыр». 

Къэбарт Мирэ.