Шэджэм къалэм къыщызэIуахащ пхьэщхьэмыщхьэм щелэжь IуэхущIапIэщIэ, мыIэрысэхэр гъэкIыным, абыхэм елэжьыным хуэщIа «Малус» компанием хыхьэу.

IуэхущIапIэщIэм хэтщ иджырей оборудованэхэмкIэ къызэгъэпэща, зэуэ тонн 1200-рэ зыщIэхуэ пхьэщхьэмыщхьэ хъумапIэ, автоматикэкIэ продукцэр зэрызэкIуэцIалъхьэ, псыхэкIхэр зэрырагъахъуэ линиехэр. Абы къыщIегъэкI абджыпсхэмрэ картон Iувым къыхэщIыкIа «тетрапак» коробкэхэмрэ игъэхъуа мыIэрысэпсхэр.

Зы лэжьэгъуэ сменэм къриубыдэу мыIэрысэ тонн 15-м елэжьэну апхуэдэ зэфIэкI абы иIэщ. Апхуэдэ лэжьыгъэ зэтегъэувэкIэм Iэмал къаритынущ ухуэныгъэм халъхьа мылъкур зэман кIэщIым къриубыдэу къыхахыжыну, адэкIи фейдэ кърагъэщIыну.

IуэхущIапIэм къыщIигъэкI продукцэм «МыIэрысэ» фIэщыгъэр зэрехьэ икIи Кавказ Ищхъэрэм и щIыналъэ псоми ар щащэ.

«ДэркIэ ар ди лэжьыгъэм къыхэдгъэхъуа къудейуэ аракъым, атIэ цIыхухэми IэнатIэхэр къахузэдгъэпэщащ», - щитхащ и телеграм-каналым Шэджэм щIыналъэ администрацэм и унафэщI Борсэ Юрэ.

БЭБЭЧ Берд.