Дунейпсо Адыгэ Хасэм и Хасащхьэм хэтхэм я зэIущIэр Налшык къалэм щекIуэкIащ. Абы хэтащ Къэ­бэрдей, Адыгей, Шэрджэс Адыгэ хасэхэм, Европэм щылажьэ Адыгэ Хасэхэм я Федерацэм, «Хэку» зэгухьэныгъэм я тхьэмадэхэр. ПэIудза щIыкIэм тету лэжьыгъэм хэтащ Израилым, Тыркум, Ставрополь, Краснодар крайхэм щыIэ Адыгэ Хасэхэм я тхьэмадэхэр. 

ЗэIущIэм кърихьэлIащ КъБР-м жылагъуэ IуэхущIапIэхэм ядэлэжьэ­нымрэ лъэпкъ IуэхухэмкIэ и ми­нистр КIурашын Анзор, ДАХ-м и Нэхъыжьхэм я зэгухьэныгъэм и тхьэмадэм и къуэдзэ Шыхъуэстэн Амдулхьэмид, Хасащхьэм хэтхэр. 
ДАХ-м и тхьэмадэ Сэхъурокъуэ Хьэутий зэIущIэр къызэIуихри, мы зэхуэсыгъуэм зытепсэлъыхьыну къы­хагъэщхьэхукIа Iуэхугъуэхэм я гугъу ищIащ. Ар иригузавэу къыхигъэщащ Анкара КАФФЕД-м и Унэу дэтыр зытращIыхьа щIым и бэджэнд пIалъэр зэриухам къыхэкIыу бэлыхь зэрыхэтыр икIи къыхигъэщащ Урысейм, хэкум я лъэныкъуэкIэ зыгуэр халъхьэфынумэ, хэпсэлъыхьыну зэ­рыхьэзырыр. Ауэ зэкIэ апхуэдэ дэIэ­пыкъуныгъэ зэрыхуэмыныкъуэр къыжраIащ Тыркум щыпсэу ди лъэпкъэгъухэм, езыхэм я къарукIэ зэфIахыфыным щыгугъыу. 
Хасащхьэм хэтхэр япэу зытеп­сэлъыхьар ДАХ-м и Уставым хэлъ­хьэжын хуей Iуэхугъуэу щыIэхэр зэпкъ­рыхынырщ, ахэр щызэрагъэ­зэхуэжыну пIалъэмкIэ зэгурыIуэ­нырщ. Къуэдзокъуэ Анатолэ жиIащ Хасащхьэм хэтхэм къагъэува Iуэхугъуэхэр зэрагъэзахуэу, Конгрессым деж IэIэткIэ хагъэхьэжын зэры-         хуейр. Псалъэм къыдэкIуэу жыпIэ­мэ, Уставыр щызэхагъэувэм яубзы­хуауэ щытащ зы къэралым е хэгъэгум щыщу Дунейпсо Адыгэ Хасэм хэтын хуейр зы хасэ закъуэу. Псоми упщIэ яIэщ ДАХ-м Къэбэрдей Адыгэ Хасэмрэ «Хэку» зэгухьэныгъэмрэ щIыхэтым теухуауэ. Сэхъурокъуэм жиIащ ар адрейхэм ебгъапщэ зэ­рымыхъунур, «Хэку» зэгухьэныгъэр ДАХ-м лъабжьэ зэрыхуэхъур, ар япэ дыдэу къэунэхуа IуэхущIапIэу зэры­щытыр, ар ДАХ-р къызэрызэрагъэ­пэщ махуэрэ апхуэдэу зэрыщытыр. Къызэхуэсахэр тепсэлъыхьащ Шап­сыгъ Адыгэ Хасэм нэмыщI Краснодар крайм къыбгъэдэкIыу иджыри Краснодар щызэхэт Хасэ зэры­щыIэр, ахэри хъарзынэу зэры­ла­жьэр, къыхыхьэну зэрыхуейр. Конгрессыр къэсыху абыхэм унафэ гуэр зэрыхуащIынур ягъэбелджы­лащ. Абы къищынэмыщIауэ Уставым хатхэнущ ДАХ-м и Нэхъыжьхэм я зэгухьэныгъэм Iуэхугъуэ гуэрым теухуауэ унафэ къищтэну хуитыныгъэ иIэныр. 
Хасащхьэм хэтхэм ДАХ-м и ГъэзэщIакIуэ гупым и комитетхэр яубзыхуащ, абы хэтынухэр ягъэбелджылащ. Псалъэм къыдэкIуэу жыпIэмэ, ДАХ-м иIэщ Къэрал IуэхущIапIэхэмрэ дунейпсо зэгухьэныгъэхэмрэ ядэлэжьэнымкIэ, Урысеймрэ хамэ къэралхэмрэ щыIэ адыгэ жылагъуэ зэгухьэныгъэхэм я лэ­жьыгъэр зэуIу щIынымкIэ, лъэпкъ, дин зэгухьэныгъэхэм яхудиIэ пы­щIэныгъэхэм зегъэужьынымкIэ, ХамэщI щыпсэу адыгэхэр адэжь ­щIыналъэм къешэлIэжынымкIэ, ­Анэ­дэлъ­хубзэр хъумэнымкIэ, егъэ­джэ­ныгъэмрэ щIэныгъэмрэ зе­гъэу­жьынымкIэ, Щэнхабзэм, хъыбарегъащIэ IэнатIэхэм ядэлэжьэнымкIэ, ЩIалэгъуалэ политикэмкIэ, спортымрэ туризмэмкIэ гупхэр. 
ГъэзэщIакIуэ гупыр 2025 - 2027 гъэхэм зэлэжьынухэм я гугъу щи­щIым Сэхъурокъуэ Хьэутий жиIащ Уставым къигъэув къалэнхэр, лъэпкъым и пащхьэ къит Iуэхугъуэ­хэр, ДАХ-м зыхуигъэувыж мурадхэр гъэзэщIэным, лъэпкъ махуэш­хуэхэмрэ махуэ хэхахэмрэ екIурэ-ещхьу дэхыным, дзэ Iуэху хэхам хэтхэмрэ абыхэм я унагъуэхэмрэ ядэIэпыкъуным нэмыщI, зэманым къыздихь Iуэхугъуэхэми елэжьыну зэрыхьэзырыр. Иджыпсту къэрал псор щIэгузавэ, даIыгъ Iуэхум жы­джэру хэтщ Дунейпсо Адыгэ Хасэри. Сэхъурокъуэм Хасэ тхьэмадэхэр къыхуриджащ иджыри къэс зэрырагъэкIуэкIам хуэдэу дзэ Iуэху хэхам щыIэхэм гуманитар дэIэпыкъуныгъэ етыныр ипэ ирагъэщ Iуэхуу зэ­рыщытыпхъэр. 
ЗэIущIэм къыщыпсэлъа, КъБР-м жылагъуэ IуэхущIапIэхэм ядэлэжьэ­нымрэ лъэпкъ IуэхухэмкIэ и министр КIурашын Анзор хъыбарыфIкIэ игъэгуфIащ зэIущIэм хэтахэр. Абы зэрыжиIамкIэ, «Яндекс»-м дяпэкIэ иIэнущ адыгэбзэ тэрмэшри. Абы ухыхьэн папщIэ, адыгэ псалъэухауэ мини 100 зэхуэпхьэсын хуейти, министерствэр и щIэгъэкъуэну а Iуэхур зэфIагъэкIащ «Черкесский Ренессанс» жылагъуэ зэгухьэныгъэм хэт щIалэхэм. МазийкIэ зэлэжьа а Iуэхур и кIэм нагъэсащ, зыIэрыхьапхъэм хуаутIыпщащ, мазэ гъунэ­гъухэм хьэзыр хъунущ. 
ЕтIанэгъэ зэлэжьынухэм, нэхъыщхьэу я пащхьэ къит къалэнхэм тепсэлъыхьащ Адыгей, Шэрджэс Хасэхэм я тхьэмадэхэу ЛIымыщо­къуэ Рэмэзанрэ Аслъэн Алийрэ, видеозэпыщIэныгъэкIэ зэIущIэм къыхыхьа, Шапсыгъ Хасэм и тхьэмадэ КIэкIыхъу Мэжид, КАФФЕД-м и лIыкIуэ Урым Бакир сымэ. Израилым и Iуэху зыIутымрэ абы щыIэ Хасэм и лэжьыгъэмрэ я гугъу ищIащ онлайну къэпсэлъа Тхьэухъуэ Зу­хьер. Къэралым иригъэкIуэкI зауэ Iуэхум къыхэкIыу, абы гъэ къэс къызэрагъэпэщ хабзэ адыгэ-щэнхабзэ фестивалыр 2025 гъэм зэрыщ­рамыгъэкIуэкIынур жиIащ Зухьер, къищынэмыщIауэ, къэрал политикэм теухуауэ еплъыкIэ щхьэхуэ зэраIэр, ар ину жаIэну зэрыхуэмейр, зыкъыхамыгъэщу, я лъэпкъ Iуэхур хуэмурэ дагъэкIыу Израилым зэ­рисыр къыхигъэщащ. 
Европэм щыIэ Адыгэ Хасэхэм я Федерацэм и тхьэмадэ Вэрокъуэ Затий иджыблагъэ хасэ тхьэмадэу зэрыхахыжар, ар иджыри илъэситI­кIэ зэрылэжьэнур жиIащ. Абы къы­дэлэжьэну, адыгэбзэр фIыуэ ящIэу цIыхуитху Хасащхьэм зэрыхагъэхьар, ахэри мэлыжьыхьым хэкум къишэу ДАХ-м хэтхэм зэрырагъэцIыхунур жиIащ. Апхуэдэуи ды­щIигъуащ Европэм щыIэ къэралхэм щыпсэу адыгэхэм я гупэр хэкумкIэ къызэрыгъэзар, Федерацэр дяпэкIи ДАХ-м дэлэжьэну зэры­хьэзырыр. 
Хасащхьэм хэтхэм я мурадхэр куэдщ, къапэщылъ къалэнхэри мащIэкъым. Ауэ лъэпкъ Iуэхур дэгъэкIыныр, дэнэ щыпсэу адыгэми ялъэIэсу лэжьэныр я плъапIэу илъэ­сыщIэм тохьэ. 
НэщIэпыджэ  Замирэ.
Сурэтыр  Къарей  Элинэ  трихащ.