КъБР-м и Лъэпкъ къэрал библиотекэм, Мэлбахъуэ Тимборэ и цIэр зезыхьэм, зэхыхьэ гуапэ щекIуэкIащ. Ар теухуауэ щытащ рес­публикэм къыщыдэкI «Адыгэ псалъэ», «Заман», «Кабардино-Балкарская прав­да», газетхэр илъэси 100 зэ­­рырикъум. Зэхыхьэр ягъэ­хьэзыращ библиоте­кэм и лъэпкъ, лъахэхутэ литературэмкIэ къудамэм и лэ­жьакIуэхэм. ЗэIущIэр ири­гъэкIуэкIащ библиотекэм и унафэщI, филологие щIэныгъэхэмкIэ док-тор, КъБР-м щIэныгъэ-      хэм­кIэ щIыхь зиIэ и ­лэ­­жьакIуэ, ­КъБР-м щэн­хабзэмкIэ щIыхь зиIэ и лэжьакIуэ Емуз Анатолэ. 

Библиотекэм щеджэ и пэшышхуэм щагъэуват «Адыгэ псалъэ», «Заман», «Кабардино-Балкарская прав­да», газетхэм я къы­дэ­кIы­гъуэ­хэр, абыхэм я тхыдэм теухуа тхылъ гъэщIэгъуэнхэр, сурэтхэр, къакIуа лIэщIы­гъуэм ­къриубыдэу къыхуа­гъэ­фэща фIыщIэ, щIыхь тхылъхэр. Ап­хуэдэу экранымкIэ ягъэлъэгъуащ газети­щым я махуэхэр щагъэлъапIэм ирихьэл­Iэу тра­ха видео фильмыр. 
- Мы махуэр махуэгъэп-сым къыщыхьа бжыгъэ ­къудейкъым, атIэ ди щIыналъэм и тхыдэм, абы щыпсэу цIыхухэм я зыужьыныгъэм мыхьэнэ зиIэ щыщ Iыхьэщ. КъыдэкIыгъуэхэм къыщы­гъэ­лъэгъуэжащ цIыхубэм я хъуэпсапIэхэр, ди респуб­ликэми нэгъуэщI щIыпIэхэ-ми къыщыхъу Iуэхугъуэхэр, - ж­иIащ Емуз Анатолэ. - Лъэпкъ къэрал библиотекэм и лэжьакIуэхэм, ди тхылъеджэхэм, си щхьэм къыбгъэ­дэкIыу республикэм и къы­дэкIыгъуищыр илъэси 100 ­зэ­рырикъуамкIэ си гуапэу сынывохъуэхъу абы щыла­жьэ­хэм. ЛIэщIыгъуэ хъуауэ ди щIыналъэм фыхуэпэ-        жу фы­хуолажьэ, Къэбэрдей-Балъкъэрым къыщыхъу политикэ, экономикэ, соци­альнэ, щэнхабзэ, щIэныгъэ-егъэджэныгъэ, дзэ Iуэхухэм ятеухуа хъыбарыщIэхэм гулъытэ яхуэфщIу, ахэр цIы­хубэм я деж нэфхьэсу. Къы­дэ­кIыгъуэхэм зи IэнатIэм фIыуэ хэзыщIыкI, ар фIыуэ зылъагъу цIыхухэр щолажьэ. Фи япэ ита нэхъыжьыфIхэм я хабзэхэр фымыгъэкIуэду, газетеджэхэм яхувиIэ зэпы­щIэ­ныгъэм зевгъэубгъуу, фи тхыгъэхэм пэплъэхэм ныбжьэгъу пэж фахуэхъуу, я чэнджэщэгъуфIуи фыкъэнэжу фыкъогъуэгурыкIуэ. Апхуэ­дэу цIыхубэм я зэкъуэтыныгъэм, ахэр зыхуей-зыщы­щIэ­хэм, я зэгурыIуэныгъэр гъэ­бы­дэным, лъэпкъхэм я зэ­хуаку зэныбжьэгъугъэ дэлъ­­­хьэным фытолажьэ. Ди гъэтIылъыгъэхэм «Социалистическая Кабардино-Балкария», «Ленин гъуэгу», «Ком­мунизмге жол» газет къы­дэкIыгъуэхэм щыщхэр зэ­­рыхэлъым, микрофильм­хэм «Къэрэхьэлъкъ», «Красная Кабарда», «Ленинский путь» газетхэр зэрытетым дрогу­ш­хуэ. Япэу къыдэкIын зэ­­ры­щIадзэрэ нобэм къэ­сыху газетхэм я щхьэр яхъу­мэ­жын, я щIэупщIэр ямы­гъэ­кIуэдын яхузэ­фIэ­кIащ. ГъащIэм къигъэувхэм зы­дев-гъэ­кIуу фи лэжьыгъэм зэ­хъуэ­­кIы­ны­гъэхэр хэфлъ­хьэн, бжы­гъэ­хэм я зэманым зыдевгъэкIун хуей мэхъу, ­газетеджэхэм я дежкIэ къы­дэкIыгъуэ щIэщыгъуэу фыкъэнэжын папщIэ. Республикэм и библиотекэ нэхъыщ­хьэм быдэу фы­къы­зэ­ры­пы­щIар, ди IуэхущIапIэм ще­­кIуэкI зэхыхьэхэр цI­ы­ху­бэм я деж зэрынэфхьэсыр къы­долъытэ. ПщIэрэ фIы­щIэ инрэ фхуэфащэщ! Къэблэгъа ИлъэсыщIэмкIи дынывохъуэхъу! ГъащIэ кIыхь фы­хъуну, узыншагъэ быдэрэ ехъулIэныгъэрэ фиIэну!
«Кабардино-Балкарская правда» газетым и редактор нэхъыщхьэ, КъБР-м и Парламентым и депутат, КъБР-м щIыхь зиIэ и журналист, ­КъБР-м и Къэрал саугъэтым литературэмрэ гъуазджэм-кIэ и лауреат Бжьахъуэ Ранетэ зэхыхьэр къызэзыгъэ­пэ­щахэм фIыщIэ щахуи­щIым, къыхигъэщащ республикэм и хъыбарегъащIэ къы­­дэкIыгъуищыр лIэщIы­гъуэ зэрырикъуам теухуа зэ­хыхьэр зэры­зы­хуащIыж Iуэ­хур зи жэрдэмхэм къыхуа­щIа гулъытэр гуапэ зэрыщыхъуар. Абы жи­Iащ щIыналъэм и щыIэкIэ-псэукIэм, зыужьы­ны­гъэм, уна­гъуэм и лъапIэ­ныгъэхэм гу­лъытэ зэрыхуа­щIыр, я IэнатIэм зэры­хуэ­пэжыр, цIы­хубэм я деж нахьэс хъыбархэм я фIагъымрэ пэжагъымкIэ жэуап зэрахьыр зэрызыхащIэр, зыхуа­гъэувыжа къа­­лэнхэмрэ мурадхэмрэ зрагъэхъулIэным зэрыхущIэкъур. 
- Газетхэм къакIуа илъэсищэ тхыдэ гъуэгуанэм дриплъэжмэ, дэркIэ газетыр ­къы­дэкIыгъуэ къудейкъым, атIэ ар цIыхубэм я гъащIэщ, лъэпкъ щэнхабзэм, хабзэм щыщ Iыхьэщ. Лъэпкъ газетхэм я тхыдэ щIэнгъуазэщ    ди илъэсищэм ирихьэлIэу иджы­благъэ къыдэкIа тхылъ­хэр. Гъэлъэгъуэныгъэм хагъэхьа а къыдэкIыгъуэхэми зыхэвгъэгъуазэ хъунущ. Иужь зэманым тиражыр нэхъ мащIэ хъуами, газетхэм я щIэупщIэр зэредмыгъэ­хыным, цIыхубэр зэрыдедгъэхьэхыным дыхущIокъу, - жиIащ «Адыгэ псалъэ» га­зетым и редактор нэ­хъы­щхьэ, КъБР-м и Жур­­на­лист-
хэм я зэгухьэныгъэм и уна­фэщI, КъБР-м щIыхь зиIэ и журналист Жыласэ ­Заурбэч. - Иджыри къэс тщIы­гъуа ди щIэ­джы­кIа­кIуэхэр иджыри ди ныбжьэгъу пэжу фы­къызэ­рынэжынум шэч къытетхьэркъым! Къэблэгъа Илъэ­сы­щIэмкIэ си гуапэу сы­­ны­вохъуэхъу!
«Заман» газетым и редактор нэхъыщхьэ, КъБР-м и Журналистхэм я зэгухьэ­ныгъэм и унафэщIым и ­къуэдзэ, КъБР-м щIыхь зиIэ и журналист Конаков Хьэ­сэни фIыщIэ яхуищIащ зэхы­хьэмрэ гъэлъэгъуэныгъэмрэ къызэзыгъэпэщахэм икIи къыхигъэщащ республикэ га­зетхэм я тхыдэм теухуауэ гъэщIэгъуэн, щIэщыгъуэ куэд абы хыхьэу зэрызэхуа­хьэсар. 
«Горянка» газетым и редактор нэхъыщхьэ, усакIуэ, тхакIуэ, драматург, жыла­гъуэ лэжьакIуэ, КъБР-м щIыхь зиIэ и журналист ­Къа­ныкъуэ Заринэ игу къигъэкIыжащ 90 гъэхэм «Адыгэ псалъэ» газетым лэжьэн зэ­рыщы­щIидзар, щылажьэхэм щIэ­ныгъэ зэрабгъэдэлъыр, зыпэрыт Iуэхум гудзакъэ зэрыхуаIэр, бзэр фIыуэ зэращIэр, уадэлэжьэнуи зэры­тын­шыр, зыпэрыт IэнатIэр зэ­рырагъэфIэкIуэным ахэр зэ­пымыууэ зэрегугъур. Ап­хуэдэу игу къигъэкIыжащ жур­налист IэнатIэм и зыу­жьы­ныгъэм хэлъхьэны­гъэфI­хэр хуэзыщIа, газетхэм я илъэ­сищэр щагъэлъапIэм иримы­хьэлIа нэхъыжьыфI­хэри. 
КъБР-м и Парламентым ЩэнхабзэмкIэ, граждан жы­лагъуэм зегъэужьынымрэ хъыбарегъащIэ IуэхухэмкIэ и ко­митетым и унафэщI Те-    куев Амурбий къыдэкIы­гъуэхэр илъэсищэ зэрыри­къуамкIэ абыхэм я  лэжьакIуэхэм гуапэу ехъуэхъуащ, хъыбарыщIэхэр цIыхубэм я деж нэхьэсынымкIэ я нэхъы­жьыфI­хэр я щапхъэу, цIы­хубэм я деж нахьэс хъыбархэм я пэжыпIэр зэхагъэкIыфу дяпэкIи я лэжьыгъэр ирагъэфIэкIуэну, я IэнатIэм зрагъэужьыну, я пщIэр къалъытэну.
ЗэIущIэм хэтащ «Минги Тау» журналым и редактор нэхъыщхьэ, КъБР-м и цIыху­бэ усакIуэ Додуев Аскэр, «Литературная Кабардино-Балкария» журналым и редактор нэхъыщхьэ, тхакIуэ, усакIуэ, зэдзэкIакIуэ Мамы­щ Владимир, КъБР-м и цIыхубэ тхакIуэ, КъБР-м щэнхабзэмкIэ щIыхь зиIэ и лэ­жьакIуэ, усакIуэ, журналист, критик, публицист Моттаевэ Светланэ, «Адыгэ псалъэ» газетым и къудамэм и уна­фэщI Уэрдокъуэ Женя, КъБР-м щэнхабзэмкIэ щIыхь зиIэ и лэжьакIуэ, журналист Текуевэ Хьэуа, библиотекэм и лэжьакIуэхэр, еджакIуэхэр. 
Емуз Анатолэ газетищым  я редактор нэхъыщхьэхэм ­ехъуэхъуа нэужь, яхуэупсащ «Народы Кабардино-Балкарии. Этнокультурный атлас» тхылъымкIэ.
Пшыхьыр ягъэдэхащ Му­зыкэ театрым и уэрэ­джы­IакIуэхэу Белоцерковская Ди­нэрэ Жубоев Жамбулэт­рэ, КъБР-м щIыхь зиIэ и артисткэ Мамбэт Мадинэ.
ТЕКIУЖЬ Заретэ. 
Сурэтхэр
Къарей Элинэ трихащ.