Къашхатауну ара тийресинде орналгъан  ательени ары командировкагъа баргъанымда жокълагъан эдим. Аны Улбашланы Зухура  ачханын да билеме. Аны биргесине дагъыда экеулен ишлейдиле: Улбашланы Мадина бла Керменланы  Аминат. Эллиледен эшитгениме кёре, бу юч тиширыу да  тигиу этерге  устадыла. Аны себепли ишсиз бир  кюн угъай, бир сагъат да турмайдыла. 
Мында, мен билгенден, терезе жабыула да сатыладыла. Аланы алыргъа келгенлеге сайлар онг барды, багъалары да Нальчикде  базарладан эсе учузуракъды.  Зухура Магомедовна  терезе жабыуланы кеси  узакъладан  келтиреди, тигип да береди, къалай тап боллугъуна да юйретеди.
Уста тиширыула  кийимлеге да ремонт  этедиле. Эллиле кёнчек бучхакъны кесип тигерге, жыйрыкъны этегин бюгерге, уллуну гитчерек , гитчени да  уллуракъ этерлерин  кёпле излеп  келедиле. Анга кесим да шагъат болгъанма: анда тургъан аз заманчыкъны ичинде бир ненча адам жумушу бла киргенди. 
«Бир жол Нальчикде жыйрыкъ алама. Ол манга уллуракъ эди, болсада, асыры жаратханымдан, алып къояма. Тенг къызларыма кёргюзтгенимде уа, аладан бири: «Бизни элде  ателье барды, ары элт, анда уста тиширыула урунадыла», - дейди. Барама. Уллу болмагъан отоуда ючеулен башларын кётюрмей тигиу эте эдиле. Тапкалада  тюрлю-тюрлю халыла, столладан биринде  ремонт этилирге келтирилген  кийимле, башхасында итиу урулуп, тап сайланып тургъан быстырла, къабыргъалада уа  кёп санда тюрлю-тюрлю  терезе жабыула.
Мен тёгерекге-башха къарай тургъунчу, тиширыуладан бири: «Не жумуш бла келгенсе, тынгылайма»,- дейди.  Жыйрыгъымы  кёргюзтеме.  Манга уллуракъды,  юсюме тап келиширча эталлыкъмысыз?», - дейме. Тиширыу, ол  Улбашланы Зухурады,  жыйрыгъыма тынгылы къарап, киерими тилейди. Сора: «Бир сагъатдан кел», - дейди.  Айтханыча этеме.  Къашхатаучу тиширыуланы уста къоллары кеслерини ишлерин этгендиле: жыйрыгъымы кийип кёргенимде,  къууанчымы чеги жокъ эди. Андан бери тигиу жаны бла жумушум болса,  жаланда бу ательеге келеме», - дейди  Гергъокъланы Залина. 
Къашхатауда бу жангыз ательеди. Аны себепли иш да кёп болады. «Оъуу жыл  бошалырны аллында, башха байрамлада  ишибиз бютюн аслам болады. Биз келгенлени жумушларын бир-эки сагъатны ичинде тамамлап беребиз. Биргеме ишлеген  Мадина, Аминат да, ишлерин тынгылы  билгенлери бла къалмай, анга жууаплы кёзден къарайдыла, келгенлени сокъурандырмаз ючюн заманларын, къарыуларын да аямайдыла. Бизге бек башы - эллилени ыразы этиудю»,-дейди  Улбашланы Зухура.