Черек районну Занкишиланы Кязимни атын жюрютген спорт комплексни 2-чи номерли спорт школуну таматасы Занкишиланы Батыр сабийлени стол теннисге юйретеди. Ол бу жумуш бла  кюрешгенли 10 жыл чакълы болады. Теннис ойнаргъа  биргесине педколледжде окъугъан Мухамед Каскуловдан юйреннгенди. Талай  замандан а окъуучуланы жыйып, спортну бу тюрлюсюню жашырынлыкълары бла шагъырей этип башлайды. Бир кесекден а жемталачыла республикалы эришиулеге да къатышадыла. Онеки команданы араларында финалгъа чыгъадыла. КъМР-ни Стол теннисден федерациясыны таматасы Андрей Климов ала  алгъан балланы ачыкълагъанда, сейир окъуна этген эди. Сора финал тюбешиуден сора ала ол эришиуден «кюмюш» бла къайтхан эдиле. 
Тренер айтханнга кёре, спортну бу тюрлюсю  бла къызчыкъла бютюн бек сюедиле кюреширге. Уяналаны Самира, Црайланы Инара, Болатланы Самира бла Амир, Ахматланы Амина, Манияланы Амина эм Алтууланы Амина бла Саида жарау этерге сюйюп жюрюйдюле эм кюн сайын усталыкъларын ёсдюргенлей турадыла. 
– Хорлам болдурур ючюн, ракетканг, топчукъ, стол да тынгылы болургъа керекдиле, – дейди Занкиши улу, ракеткаланы къаллай тюрлюлери болгъанларын да кёргюзте. – Учузурагъыны багъасы минг сомду. Аны бла да боллукъду ойнаргъа, алай 25 минг тургъан ракетка бла урсанг а, топчукъ бурулуп, алай  барады. Аны артха къайтаргъан да къыйыныракъды. 
Быйыл ол секциясына 2-3 класслагъа жюрюгенлени алгъанды. Бюгюнлюкде биринчи жаш тёлю разрядлары болгъанла да бардыла. Ким биледи, былай барса, энди жарау этип башлагъан сабийледен спортну усталары да чыгъарла. 

Къасымланы Аминат. 
Суратда: (солдан онгнга) Занкишиланы Батыр, Црайланы Инара эм Манияланы Амина.