Нальчикде Музыка театрда Юйюрню жылын къууанчлы халда жабыу болгъанды. Анга аталгъан байрамгъа «Ана махтаулукъну» майдалы бла белгиленнген, «Юйюрню жылы» битеуроссей эришиуге къатышхан, башха жетишимле болдургъан юйюрле чакъырылгъан эдиле.
Аланы алгъышлай, КъМР-ни Башчысы Казбек Коков юйюр жамауатны айныууну мурдору болгъанын чертгенди. Къыралда юйюрге, аналагъа бла сабийлеге энчи магъана берилгенин, халкъда алагъа уллу хурмет этилгенин да айтханды.
– Юйюрню жылы Россейни Президентини Указы бла тохташдырылгъан эди. Аны ол оноуу бла бирге юйюрлеге хар жаны бла да болушлукъ тапдырыуну, халкъны саны ёсюп барырча этиуню мадарлары белгиленнгендиле эмда тамамланнгандыла,-деп, республиканы Башчысы къыралда юйюрлеге болушлукъну энчи амалы къуралгъанын эсгертгенди. Ол санда сабий туугъандан башлап, анга 17 жыл толгъунчу тёлеуле этиледиле, аналыкъ ахчаны эм учузуракъ ипотеканы болжалы созулгъанды. Кёп сабийли юйюрню даражасы битеу жерледе да бир кибик болурча этилгенди.
– Аны хайырындан а битеу регионлада къыралда болушлукъ бериуню тенг онглары тохташдырылгъандыла. Федерал болушлукъгъа регионла къошумчулукъ этедиле. Къабарты-Малкъарда бешинчи сабий туугъанда юйюрге алгъын 250 минг сом берилген эсе, энди ол 500 мингнге жетгенди. Кёп сабийли юйюрле садик ючюн тёлеуледен эркин этилгендиле, - деп, Казбек Коков къырал болушлукъ игилене барлыгъына ышандыргъанды.
Аны юсюнден Къырал советни кёп болмай ётген жыйылыуунда да айтылгъанды. «Анда Владимир Путин миллет проектлеге юйюрлени жашауларын ырахат этиу жаны бла мадарла кийирилликлерин белгилегенди. Кёп сабийли юйюрлеге тутхучлукъ этер мурат бла уа «Жигит ана» майдал бла саугъаланнган тиширыуланы Урунууну Жигитине тенг этерге, битеу социал онгла берирге деп аллай башламчылыкъ этгенди. Быйыл ноябрьде уа РФ-де юйюр эмда халкъны саны бла байламлы тамамларгъа деп белгиленнген мадарла жамауатны сюзюуюне берилгендиле»,-дегенди регионну оноучусу.
Казбек Коков юйюрлеге тутхучлулукъ этиу бла бирге битеу бёлюмлени да айнытыргъа, халкъны къолайлыгъын ёсдюрюрге керек болгъанын да чертгенди. «Социал-экономика политикада ол жумушла баш магъананы тутарыкъдыла. КъМР-де сабийле барысы да къыралны къайгъырыуун сезерча этилликди»,-дегенди.
Къабарты-Малкъарны Башчысы, жыйылгъанланы Жангы жыл бла алгъышлап, юйюрле сабий ауазладан толурларын, саулукълу, насыплы да болурларын тежегенди.
Къууанчлы жыйылыугъа социал, медицина, билим бериу, маданият, спорт жаны бла да битеу тукъумлары бла ишлегенле чакъырылгъан эдиле – битеу да 15 юйюр. Аланы араларында Црайлары да бар эдиле. Эгечле Любовь бла Роза Черек районда халкъны социал жумушларын тамамлау арада урунадыла. Любовьну къызы Мариям да бу усталыкъны сайлагъанды.
Саулукъ сакълауда уа Хутуйланы Светлана бла аны къызы Мадина Шогенова белгиленнгендиле. Ала республикада аллергологияны мурдорун салгъанладыла. Светлананы туудугъу Лаура да медицинаны сайлагъанды.
Холамханланы Боташ бла Лежинка уа тукъумда устазланы ызын башлагъанладандыла. Боташ Абдуллаевич Уллу Ата журт урушну ветераны эди. Ол 1946 жылдан бери устазлыкъ этгенди. Аны юй бийчеси Лежинка да жашауун билим бериуге жоралагъанды. Аланы къызлары Сотталаны Лидия да устазды, ол «РФ-ни битеулю билим бериуюню сыйлы ишчиси» белгиге тийишли болгъанды. Аны жашы Расул да юйюрню тёресин андан ары бардыргъанды, туудугъу Зулейха уа Филатов атлы сабий больницаны тамата илму къуллукъчусуду, сабий хирургияны кафедрасында окъутады.
Маданиятда белгиленнгенлени арасында Акъкъызланы юйюр барды. Юйюрню башчысы Якубну, аны юй бийчеси Сияраны бла къызлары Имараны суратлары къыралда, андан тышында да кенг белгилидиле, ала кёп тюрлю саугъалагъа тийишли болгъандыла, халкъла аралы кёрмючлеге салынадыла.
Ажоланы уа спортда атлары айтылады. Гёжефле Асадулла бла Юсюп спортну усталарыдыла, СССР-ни кёп кере чемпионлары болгъандыла. Бюгюнлюкде жаш спортчуланы юйретедиле. Туудукълары Азамат бла Исмайыл да жашауларын спорт бла байлагъандыла – ала да эркин тутушууда россейли эм халкъла аралы эришиуледе алчыладыла, Россейни спортуну усталарыдыла.
«Жылны юйюрю» регион эм битеуроссей конкурс а быйыл 9-чу кере бардырылгъанды. Анга битеу къыралдан 11 мингден аслам юйюр къатышханды. Нальчикден Артур бла Залина Тхагалеговла уа анда «Кёп сабийли юйюр» бёлюмде алчыла болгъан эдиле. Ала жети сабий ёсдюредиле.
Къууанчлы жыйылыугъа «Ана махтаулукъну» майдалына тийишли болгъан сыйлы анала да чакъырылгъандыла. Быйыл а бу къырал саугъа бла 20 тиширыу саугъаланнгандыла. Аланы араларында Жаболаны Замира да барды. Ол, Анзор Хусинов бла юйюр къурап, бюгюнлюкде алты сабий ёсдюредиле. Бу фахмулу юйюр, жыр айтып, жыйылгъанланы къарсларына тийишли болгъандыла.
Быйыл 70 юйюр «Кертичилик эмда сюймеклик ючюн» майдал бла белгиленнгендиле. Ала да чакъырылгъан эдиле Музыкалы театрда байрамгъа.
Огъурлу юйюрлеге аламат концерт программа да къуралгъан эди. «Кабардинка», «Балкария», «Гордость Кавказа» тепсеу къауумла, Текуланы Амырбий, «Голос. Дети» телепроектге къатышхан Идар Коцев, Жанна Тхашукоева, Азамат эм Рената Бековла къууанчлы тюбешиуге къууат салгъан эдиле.
Тикаланы Фатима.
Суратланы Элина
Караева алгъанды.
