Бюгюнлюкде Къабарты-Малкъарда 20 уллу инвестиция проект бардырылады. Аладан алтысы эм къыйматлыгъа саналадыла.
– Проектле тюрлю-тюрлю кезиуледе тамамланыллыкъдыла. «Эльбрус» тау-лыжа курортну айнытыу бла байламлыды. Анга 100 миллиард сомдан аслам къоратыллыкъды,- дегенди КъМР-ни экономиканы айнытыу министри Рахайланы Борис.
Шимал Кавказны айнытыу жаны бла Кавказ.РФ институт туризм бла байламлы инфраструктураны жангы объектлерини къурулушу бла кюрешеди. Алай бла келир жылда Минги тауну этегинде жангы канат жолла бла тау-лыжа ызла хайырланыргъа берилликдиле.
КъМР-ни Экономиканы айнытыу министерствосундан билдиргенлерича, былтыр «Эльбрус» курортда 700 мингден аслам адам солугъанды. Быйыл андан иги да кёп келликлерин сакълайдыла.
- Саулай алып айтханда, былтыр Къабарты-Малкъарда 1,5 миллиондан артыкъ адам солугъанды. Ол себепден бизни баш борчубуз аланы жумушларын тынгылы тамамланырча этиудю,- деп къошханды Рахай улу.
Алчы проектлени санына Нальчикде «Мэй» бла «Восточный» микрорайонла, Тырныауузда вольфрам-молибден комбинат, тахта кёгетле ёсдюрген «Чегем Агро» теплица комплекс эм IT-парк киредиле.
Министр айтханнга кёре, гитче эм орта предпринимательлеге болушлукъгъа республика 200 миллионнга жууукъ бёлгенди. Болсада, аны бла бла чекленип къалмай, бизнесге иги онгла къурарча да мадар этиледи.
