Таулагъа ёрлеуню бла альпинизмни сюйгенле 8-12 июньда республикабызда  «Россейни къаялары. Элбрус 2024» деген фестивальгъа жыйыллыкъдыла, ол Тырныауузда бла Джан-Туугъан тауда бардырыллыкъды. Шёндюгюлю тарыхыбызда ол спортну эки тюрлюсюн бирикдирген биринчи башламчылыкъды, аны Россейни таулагъа ёрлеуден эм альпинизмден федерациялары Къабарты-Малкъарны Спорт министерствосуну болушлугъу бла къурайдыла.   

Бусагъатда анга къатышыргъа сюйгенлерин Калининграддан Амурдагъы Комсомольск шахаргъа   эмда Петропавловск-Камчатскийге дери 314 инсан, сора Азербайджандан (Баку) да талай адам билдиргендиле. Алай бла фестивальны географиясы 60 шахар болады. Ол алыкъа ахыр тарих тюйюлдю, анда кесин сынаргъа излеген хар инсан да заявканы толтурургъа эркинди: профессионалла, таулагъа ёрлеу бла энди кюрешип башлагъанла да. Экинчи къауумгъа деп энчи школ ишлерикди, алагъа оборудование хаух да берилликди. Эришириклени араларында эм белгили альпинистле – дунияны тёрт кере чемпиону Дмитрий Шарафутдинов, Европаны бла дунияны чемпиону Алексей

Рубцов, Россейни жети кере чемпиону, Европаны чемпионатыны призёру Дмитрий Факирьянов, битеудуния оюнлада хорлагъан Динара Фахритдинова, Россейни альпинизмден сегиз кере чемпиону Евгений Дмитриенко эм башхала бардыла. 

Битеу къыралдан Минги тауда жыйыллыкъланы асламысы беш кюнню ичинде тюрлю-тюрю трассалада барып кёрюр мурат бла келедиле. Ала фестивальгъа аталып жарашдырылгъандыла, жангыдыла, къоркъуусуздула. Ёрлеуню «Боулдеринг» бёлюмюнде – 300, къыйынлыкъларына кёре – 60 трасса эмда 15-20 мультипитч боллукъдула.

Боулдерингде аланы узунлукълары 5 метрге дери жетерикди, страховка бауну орунуна уа къаяланы тюплерине матла салынырыкъдыла. Къыйынлыкъларына кёре трассала бийик боллукъдула, алада бир страховка бау тартыллыкъды. Мультипитчде уа талай трасса бир ызгъа бирикдирилликдиле, алагъа спортчула экеу-экеу болуп, бир бирлери бла бау бла байланып ёрлерикдиле, бийикликлери 100  метрден асламды. Эришиуледе спортчула жыл санларына кёре талай къауумгъа юлешинирикдиле. Алагъа къатышханла, сынамларын ёсдюргенден сора да, хорласала, саугъала аллыкъдыла. Жыйылгъанланы барысын да таулагъа сюймеклик, бирча ниетли адамла бла заманларын зауукълу ётдюрюу бирикдирликди.  

Фестивальны ачылыуу Элбрус элде Къабарты-Малкъар къырал университетни базасында сагъат 9:30-10:00 боллукъду, анга белгили спортчула, сыйлы къонакъла да келликдиле. Андан сора ёрлеуле башланарыкъдыла.

Кульчаланы Зульфия.