Кёзлери тахта кёгетлени бишгени  бла бишмегени  къайсысы болгъанын кёредиле, ол а, аланы айырып, не теренде ёсгенин да табып, жара салмай жыяды. Биз аны къурау бла эрттеден бери кюрешебиз, тинтиуле, сынам ишле бардырабыз. Роботну жалгъан интеллекти боллукъду, аны да бизни ара жарашдырыргъа умутлуду. Бу затны къуру сабанлада угъай, тюкенледе, юй мюлкледе, сатыу-алыу аралада окъуна хайырланырча этерге сюебиз», – дегенди ол.

Быллай техника эл мюлкде бюгюн-тамбла чыгъарыкъды деп айтырча тюйюлдю. Ол, аны сыфатын алимле ойларгъа кюрешгендеча,  узакъ кезиуледе боллукъду.

Тёрели оборудованияны юсюнден айтханда уа, кёрмючде тракторла, дагъыда комбайнлагъа тагъып хайырланылгъан затла бар эдиле. Денис Чугуев, Ростовдан «ЛТД» компанияны бёлюмюню башчысы, терек бахчачылагъа керек техниканы кёп тюрлюлерин кёргюзтгенди: бутакъланы кесген, суу салгъан, тирликни жыйгъан, жарашдыргъан. «Аланы кёп къалмай барын да тыш къыралладан (Германия, Италия, Турция, Испания) келтиребиз. Арт заманлада ол къыйыныракъ болгъанлыкъгъа да, ишни тыймагъанбыз, амал табаргъа кюрешебиз. Кесибизде уа бахчалада изленнген ууакъ керекле, дагъыда арбала, орунла чыгъарабыз. Къабарты-Малкъарда къыйматлы ишлейбиз, хайырланыучуларыбызны саны кёпден-кёп бола баргъанын да белгилерге боллукъма. Алагъа не жаны бла да онг берирге амалыбыз барды, къысха айтханда,  таза сабанда бек тынгылы, шёндюгюлю технологияла бла терек бахча къураргъа къолубуздан келликди», – дегенди ол.

Къабарты-Малкъардан «АгроДрон pro» компанияны кеси алларына учхан аппаратлары (дронла) да кёзге уруна эдиле. Бу затла сабанлагъа химия препаратланы сепгенде хайырланыладыла. Аны келечиси Заурбек Кантиев айтханнга кёре, эм гитчесине он литр сыйынады, ол аны бир гектар жерге себип жетдиреди. Эм уллу дрон а 40 литр кётюреди, он минутха тёрт гектар сабанны къурт-къумурсхаладан къырып чыгъады неда битимлени къоруулагъан затланы жаяды. Бир кюннге 120 гектарда ишни тамамлап чыгъаргъа онг береди ол. Тёрели трактор а аны неллай бир кёп заманнга бошарыгъын тергеген къыйын тюйюлдю. «Аны ючюн болур, бизни бла бир  ишлеген фермерлени  байламлыкъны ызын  юзмегенлери. Кёплери уа гербицидлени тракторла бла жайыуну къоюп къоядыла. Биз эллилеге консультацияла бла да себеплик этерге боллукъбуз, сабанларыны уллулугъун, алада не зат къалайда ёсгенин тынгылы  тергерге къолубуздан келеди», - деп белгилегенди Заурбек.

Форумну программасында айтылгъаннга кёре,  аны чеклеринде «Эм иги фермер» эришиуде  хорлагъанланы да саугъаларыкъ эдиле. Кёрмючню кезиуюнде сахнагъа чыгъып, власть органланы, компанияланы келечилери да сёлешгендиле, жырчыла да къараучуланы кёллерин кётюргендиле.

Къонакъланы бизни республикада алчы эл мюлк предприятиялагъа элтип, алада болгъан онгла бла шагъырейлендирирге дегендиле.

Алгъыннгы форумладача, бу жолгъу жумушну да хайыры иги болурун сакълайдыла аны къурагъанла. Сёз ючюн, аны алгъын бардырылгъан кезиулени барында да 250 миллион сом багъасына келишимле этилгендиле. Алагъа аслам  адам къатышханы, ала ишлерине, кеслерине да магъаналы затланы  кёргенлери, билгенлери да хайырлыды.

Улбашланы Мурат.