КъБР-м СпортымкIэ и министерствэм зи узыншагъэм сэкъат иIэ сабийхэр спортым щыхуагъасэ и еджапIэм екIуалIэ цIыкIухэм я зэхьэзэхуэ Налшык къалэм и «Гладиатор» спорт комплексым щекIуэкIащ иджыблагъэ. «ГугъапIэхэм я къежьапIэ» - арат абы фIащар.

Зэхьэзэхуэм еплъыну икIи еджакIуэ цIыкIухэм къадэщIыну абы щыIащ КъБР-м и Парламентым и депутатхэу Ахъмэт Амиррэ Шыпш Аслъэнрэ, футболым и ветеранхэм я «Дружба» клубым хэтхэр, УФ-м цIыхубзхэм футболымкIэ я командэ къыхэхам и тренер нэхъыщхьэ Красножан Юрэ, дзэ Iуэху хэхам хэтахэр, Урысей футбол зэгухьэныгъэм и щIыналъэ менеджер Зайцевэ Татьянэ сымэ, нэгъуэщIхэри.

КъызэгъэпэщакIуэхэм къапщытэжащ дызэрыт илъэсым спорт еджапIэм и гъэсэнхэм яхузэфIэкIахэр икIи абыхэм ящыщу ехъулIэныгъэ зиIахэм фэеплъ саугъэтхэр, щIыхь тхылъхэр, медалхэр иратащ, гуфIэгъуэ Iэни къыхуаIэтащ.

                                                                                  КЪАНШЫУЕЙ Алим.