Къабарты-Малкъарны къырал заповедниги тауланы халкъла аралы кюнюн белгилеуню чеклеринде «Восточнокавказский тур» деген ат бла кёрмюч бардырады. Заповедникни экология жарыкъландырыу эмда туризм бёлюмюню башчысы Тогъузаланы Лейла бу жумушну магъанасын былай ангылатханды: «Республикабызны инсанларын эмда тышындан келген къонакъланы къыралыбызны заповедный системасы бла шагъырейлендирирге, аны сау дуниягъа энчилигини юсюнден хапарларгъа, сакъланнган табийгъат тийрелеге жамауатны эсин бурургъа сюе эдик».

Кёрмюч Къабарты-Малкъарны Миллет музейинде барады. Анда къыркъдан аслам сурат барды. Алагъа къарагъанла кийик табийгъатны дуниясын, аны тамашалы мюйюшлерин, жаныуарланы, бегирекда сагъынылгъан жугъутурланы жашауларындан суратланы кёрюрге боллукъдула.

«Бизде заповедникде къорууланнган жаныуарладан бири ма ол жугъутурду. Ол жаланда Шимал Кавказда жашайды, кеси да, тас болуп къалыр деген хыйсапдан,  Къызыл китапха киреди. Жугъутурну кюнчыгъыш эмда кюнбатыш кавказлы тюрлюлери барды. Экилери да бир-бирге ушайдыла, жаланда мюйюзлерини эмда сакъалларыны узунлукълары аз башхаракъды. Эркеклери тишилеринден къайда мазанлыдыла, ауурлукълары бир центнерге окъуна жетиучюдю. Бюгюнлюкде заповедникни жеринде алты минг чакълы жугъутур барды. Учреждение къуралгъанлы бери аланы саны 5,2-6 минг болады. Бегирек да Бызынгы эмда Башиль-Чегем тийреледе кёпдюле ала.

Алай бла кёрмюч 4 декабрьден башлап, келир жыл 15 январьгъа дери бардырыллыкъды. Хош келигиз, туугъан жерибизни суратха тюшген тамашалы ариулугъуна къарагъыз», - деп чакъыргъанды Тогъузаланы Лейла.

Улбашланы Мурат хазырлагъанды.