Къабарты-Малкъарда аш-азыкъ чыгъарыучу эмда жарашдырыучу предприятияла быйыл ноябрьге дери иги кесек продукция чыгъаргъандыла. Шимал-Кавказ статистика ведомствону тергеулерине кёре, ол былтырдан эсе кёбюрек окъуна болгъанды, дегендиле республиканы Экономиканы айнытыу министерствосунда.

Ёсюм ма бу бёлюмледе болгъанды: жемиш консервала (14,7%), къургъакъ крахмал (8%), къыймала (3,4%), сары жау эмда битим жаула (19%), ийнек сют (9%), сют баш (3,4%), комбикормла (54,5%) чыгъарыуда. Сыраны (13%), татлы (16,4%) эмда гара сууланы производстволары да къошханды.

Тийишли предприятиялада дагъыда спирт, аракъы, чагъыр эмда ликёр кёбюрек чыгъарылгъандыла. Аны бла быйыл ал он айны ичинде аш-азыкъ продукцияны производствосуну индекси - 103,6, сууланы уа – 207 процент болгъанды.

Улбашланы Мурат.