«Хьэрычэт Iуэху мыинымрэ курытымрэ, уней хьэрычэт щIэн жэрдэмхэр», «Дунейпсо кооперацэмрэ экспортымрэ» лъэпкъ пэхуэщIэхэм япкъ иткIэ лажьэ программэм тету КъБР-м экспортыр дэIыгъынымкIэ и центрым ди республикэм къригъэблэгъащ Азербайджаным и IуэхущIапIэхэм - «Vumes»-м, «Tamstore», «Merano-Baku»-м, - я лIыкIуэхэр.
Япэ махуэм ахэр щрагъэблэгъащ «Синдика» хъэщIэщым икIи абдеж щрагъэлъэгъуащ ди щIыналъэм и IуэхущIапIэхэу «Лэгъупыкъу», «Сириус М», «Псынэ», «Псы къабзэ», «Аква-кристалл», «Фрукт-сити», «Налшык-IэфIыкIэ», «Дзэлыкъуэ кIэртIоф», «БАЗИС», «ИП Мисиров Д.Х.»-м я продукцэхэр.
«Дызэрыт илъэсым и кIэм къриубыдэу ди лэжьыгъэм нэхъри зедгъэубгъун мурадхэр диIэу Къэбэрдей-Балъкъэрым дыкъэкIуащ ди зэпыщIэныгъэхэм зедгъэубгъун, фи щIыналъэм ит IуэхущIапIэхэм я унафэщIхэр зэдгъэцIыхун, къыщIагъэкI продукцэхэр зыхуэдэр зэдгъэщIэн, зэдгъэлъагъун щхьэкIэ», - жиIащ «Vumes»-м и унафэщI Шарифов Вугар.
ЕтIуанэ махуэм хьэщIэхэр щыIащ «Велес-Агро» IуэхущIапIэм икIи зыщагъэгъуэзащ абы и лэжьыгъэр зэрызэтеухуа щIыкIэм икIи ялъэгъуахэр ягу зэрырихьар жаIащ. ИужькIэ ахэр кIуащ псы къабзэхэр щрагъахъуэ «BabugenT» IуэхущIапIэмрэ Налшык и хьэлвэ заводымрэ.
Хэгъэрейхэм къызэрыхагъэщамкIэ, ди республикэм и хьэрычэтыщIэхэм мы Iуэхур къахуэщхьэпэнущ я лэжьыгъэр ирагъэфIэкIуэнымкIэ, нэгъуэщI шIыналъэхэм сату щIыпIэхэр, щэхуакIуэхэр къыщагъуэтынымкIэ, апхуэдэуи ахэр ди республикэм кърашэлIэнымкIэ, къыщIагъэкI продукцэхэм я лIэужьыгъуэхэми куэдагъми хагъэхъуэнымкIэ.
Азербайджаным къикIа хьэщIэхэми IэмалыфIхэр ягъуэтащ ди республикэм къыщыщIагъэкI, фIагъ лъагэ зиIэ продукцэхэр зрагъэлъагъу къудей мыхъуу, атIэ IуэхущIапIэхэм пIалъэ кIыхькIэ зэрызэдэлэжьэну щIыкIэхэм ехьэлIа зэгурыIуэныгъэхэри зэращIылIэну.
ХЬЭЩЫКЪУЕЙ Олег.
