Шёндю Москвада Россейни Президенти Владимир Путин кезиулю тюзюнлей эфирни бла пресс-конференцияны бардыра турады. Тюшешиу бирикдирилип бардырылады.

Къырал башчыбыз билдиргеннге кёре, бюгюнлюкде россейли экономиканы ёсюп баргъаны белгилиди, ол кёрюмдю къыралны жалынчакъсызлыгъы тутхучлу бола баргъаныны белгисиди. Ол шарт Россейге бек магъаналыды, нек дегенде, жалынчакъсызлыкъ тас болса, къыраллыгъыбыз жокъну орнунда боллукъду. «Жалынчакъсызлыкъ- хар инсанны ичинде, жюрегинде болургъа керекди»,- деп чертгенди Владимир Путин.  

Бюгюнлюкде Россейни экономикасында болум игиди, 2025 жылда ич валовый продуктны ёсюу 2-2,5 процент боллукъду, дегенди ол.

Андан сора да Владимир Путин багъаланы тохтаусуз ёсюп баргъанларыны юсюнден жарсып айтханды. Алай ол болумну узакъгъа созмай тюзетирге къыралны къолундан келликди, деп чертгенди  ол.

Аны бла бирге Владимир Путин къыралны Ара банкы къытлыкъны ёсюп барыуун тохтатыргъа алгъадан къыйматлы амалланы къурамагъанын айтханды. Ол жумушла кезиуюнде этилселе, шёндю болум иги боллукъ эди. Болсада, банклада процентлени тохтаусуз кётюрюлюп барыулары  уа башда сагъынылгъан кемчиликле бла байламлы тюйюлдюле, деп белгилегенди.

Дагъыда Владимир Путин аш-азыкъгъа багъала кётюрюлюп баргъанын жарсып айтханды, ол санда бир-бир регионлада сары жауну багъасы ёсгенди. Ала санкцияланы кийирлгенлери бла, сора бу кезиуде адамла аслам халда кёп затны сатып алгъанлары бла байламлыдыла. Болсада россейли экономика эм жер-жерли власть органла болумну тюзетирле деп ышанама, дегенди ол.