«Къоркъуусузлу тап жолла» миллет проектни чеклеринде мадар этгенде, жамауат бла байламлыкъ жюрютюуге уллу эс бурулады, дейдиле КъМР-ни Транспорт эмда жол мюлк министерствосунда.

Бу проект ачыкъ халда бардырылырча, министерство регионну жамауат биригиулери бла келишиулюкде ишлейди. Экинчилерини келечилери жоллада этилген ишлеге кёз-къулакъ боладыла, ала башлана тургъанда эмда объектле хайырланыугъа берилгенде хар жумушха да къатышадыла.

Министерствода Жамауат советни эмда Битеуроссей халкъ фронтну КъМР-де бёлюмюню келечилери быйыл къайда не зат этилген эсе да, аны барына да кёз-къулакъ болгъандыла. Регионну Жол управлениясыны специалистлери ала бла бирге ол объектлеге къарагъандыла, айтылгъан затлагъа эс бургъандыла, кемчиликлени кетергендиле. Жамауатны келечилери регион магъаналы трассалада, Нальчикде орамлада этилген ишлеге да кёз жетдиргендиле, къуру быйыл тамам этилген угъай, келир жылгъа дери созулгъан объектледе да болгъандыла. Сёз ючюн, Дейское элде орамладан бири да аллай тизмеге киреди.

Министерствода айтханларыча, быллай байламлыкъла ишге хайырлыдыла. Ахыр жыллада былай айтып белгилерча аллай уллу кемчилик табылмагъанлыкъгъа, жамауатны келечилери жол объектлеге контроль этгенлери ишле ачыкъ бардырылгъанларына шагъат болады.

Улбашланы Мурат хазырлагъанды.