КъМР-ни Маданият фондунда,  Азербайджан халкъны «Азери» деген миллет арасы къурап, СССР-ни халкъ артисти Рашид Бейбутовну 110-жыллыгъына аталгъан тюбешиу бардырылгъанды. Ары бизни республикада жашагъан башха миллетлени араларыны келечилери да къатышхандыла.

Къууанчлы ингирни ача, фондну таматасы Люаза Макоева быллай тематикалы ингирлени жылны ичинде  ётдюргенин билдиргенди.

- «Азери» а кеслерини кезиулери жетгенде, айтхылыкъ Рашид Бейбутовну эсгерирге сюйгендиле да, анга биз ыразыбыз, - деп чертгенди ол.

Ызы бла сёз азербайджанлыланы маданият араларыны таматасы Али Дадашевге берилген эди. Ол,  келгенлеге жюрек ыразылыгъын билдирип, азербайджан халкъны маданиятына эмда саулай Совет Союзну да жыр искусствосуна Рашид Бейбутов къаллай къыйын салгъаныны юсюнден хапарлагъанды. «Я встретил девушку...» деген жырны биринчи болуп халкъгъа ол эшитдирген эди.

- Алгъыннгы Совет Союзну республикаларында андан адамла бек сюйген жыр болгъанды деп мен билмейме. Рашидни ауазы эшитилмеген хазна жер жокъ эди. «Аршин мал алан» деген фильмден сора уа Бейбутовну билмегенле да таныгъан эдиле. Аны къыралны кинотеатрларында кёргюзтгенлей кёп заманны тургъандыла. «СССР-ни халкъ артисти» деген сыйлы ат да анга андан сора берилген эди. Жырчы Гюржюде туууп, кёп жылланы Ереванда операны бла балетни театрында жырлап тургъанды. Уруш жыллада Крым фронтда,  аскерчилерибизни кёллерин кётюре, концертледе жырлагъанды, - дегенди Али Айдынович.

Андан сора жыйылгъанла «Аршин мал алан» деген фильмге къарагъандыла, жырчыны жырларына тынгылагъандыла.

Ызы бла маданият араланы башчылары Рашид Бейбутовну чыгъармачылыгъы бла байламлы кеслерини эсгериулерин айтхандыла.     «Сябры» деген миллет араны таматасы Павел Сидорук Бейбутовну жырларына узакъ белорус элчикде патефонда тынгылаучусуну юсюнден эсгергенди.

- Элде ток жокъ эди мен гитче заманда. Аны себепли патефонлада пластинкаланы сокъдуруп, жашау алай бара эди. Рашид Бейбутовну жырларын а халкъ бек сюе эди, - деп хапарлагъанды Павел Фёдорович.

Андан сора сёз 2-чи лицейни окъуучусу Месум Джаббаровха берилгенди. Ол «Россей бла Азербайджан» деген назмуну айтханды. Фахмулу жашны жыйылгъанла къызыу къарсла бла ашыргъандыла.

«Вече» деген араны таматасы Роман Литвинов а жырчы халине кёре интернационалист болгъанына энчи эс бёлгенди.

-  Гюржюде туууп, Арменияны музыка искусствосун айнытыугъа болмагъанча уллу къошумчулукъ этген азербайджанлы жаш аламат юлгюдю. Совет Союзну Баш советини Азербайджандан депутаты болуп кёп жылланы тургъан фахмулу жырчы эди. Аны чыгъармачылыгъын бла шёндюгю эстраданы тенглешдирирге окъуна къыйынды. Аллай хунерли жырчыланы энди кёрюрбюзмю, не билейим, -дегенди ол.

Ызы бла жыйылгъанланы азербайджан халкъ тепсеу бла Нурали  Валехов . бла  Ясмина  Фирова къууандыргъандыла.

 Ол кюн ары чакъырылгъанланы араларында «Заман» газетни корреспонденти Темуккуланы Асият да бар эди. Тюбешиуню къурагъанлагъа ол энчи ыспас этип, ары келген хар инсан да республикада шуёхлукъ, тенглик болурун сюйгенин чертип, быллай байрамла адамланы биригиулерине себеп болгъанларын белгилегенди.

Бу тюбешиуге чакъырылгъанла бары да Рашид Бейбутовну чыгъармачылыгъы аланы артха жашлыкъларына къайтаргъанын белгилеп, бу аламат маданият ингирни къурагъанлагъа  «Азерини» таматасыны орубасары Шамо бабаевха бла Акиф Мамедовха  ыразылыкъларын билдиргендиле.

Таппасханланы Аминат.