Быйыл регионлада "Къоркъуусуз эм тынгылы автомобиль жолла" миллет проектге кёре 2 минг километр чакълы бир  жоллагъа тынгылы ремонт этилгенди эм сетьлени да  жангыртхандыла.

 - Сагъынылгъан проектни чеклеринде уллу  объектледен сора да, сетьлеге да къаралады. Бу жаны бла жетишимлени энчи белгилерчады. Проект бардырылгъанлы  алты жылны ичинде шахарланы тийресинде 31 минг километр чакълы жол мардалагъа келиширча болгъандыла.   Ала микрорайонлагъа, жангы жашау журтла ишленнген, социал учрежденияла, сатыу-алыу точкала эм энчи иели арбазла орналгъан - жамауат тири хайырланнган жолладыла,- дегенди РФ-ни  Правительствосуну Председателини орунбасары  Марат Хуснуллин.

Къабарты-Малкъарны юсюнден айтханда, миллет проектге кёре иги кесек иш тамамланнганды. Быйыл окъуна регион магъаналы жолланы 18,5 километр тенгли биринде къоркъуусузлукъну жалчытхан темир буруула жарашдырылгъандыла, жорукъланы билдирген 1700 белги салыннганды эм 240 минг метр ыз тартылгъанды. 

Жылны ахырына дери энтта да 80 километр чакълы бирде кече жарытырча мадар этилликди, ол санда узакъда орналгъан  элледе да.  Аны бла бирге Т.7. светофорлары бла "зебрала" эм  21 километрде тротуарла  ишленнгендиле эм башха тийишли жумушлагъа да эс бурулады.  Быллай амал жоллада аварияланы азайтыргъа ахшы себеплик этгенин да энчи чертирчады. 

 Саулай алып айтханда, алты жылны ичинде республикада 1118 километрде жоллагъа тынгылы ремонт этилгенди. Аны иги кесеги неда 95 километри  Нальчикге жетеди.  

«Регионал эм жер-жерли  жол сеть" федерал проектни магъанасы жолланы  85 проценти мардалагъа келиширча эм биринчиси уа  къоркъуусуз болурча этергеди.
Алай бла быйыл Нальчикде 11 километр чакълы бирде сегиз жол жангыртылгъанды.  Эсеплей айтханда, республикада жолланы 84 проценти жангы излемлеге келиширча боллукъдула.

Миллет проект тири бардырылгъаныны баш сылтауларындан бири федерал ара регионлада жол  ведомствола да къысха байламлыкъда ишлегенлерини хайырынданды.

Эсге сала айтсакъ, мындан арысында да республикада   ол халда ишлерге жангы объектлени болжалдан кеч къалмай тап халгъа келтирирге  таукелдиле.