КъМР-ни Башчысы Казбек Коков Къабарты-Малкъарны келечилерини къаууму бла «Единая Россия» битеуроссей политика партияны XXII съездини ишине къатышханды. 
Анда баш магъаналы ишге Россейни Президенти Владимир Путинни делегатлагъа чакъырыу сёзю саналгъанды.  Къыралны Башчысы партияны ишине бийик багъа бергенди, «единороссланы»  СВО-гъа къатышыуларыны, фронтха этген болушлукъларыны юслеринден айырып айтханды.
 «Энчи аскер операцияны биринчи кюнюнден окъуна «Единая Россия» аскерчилеге тутхучлулукъ этгенлей турады: жигитлерибизге бла аланы юйюрлерине право эмда социал жаны бла да болушлукъ тапдырыуну къыйматлы  амалларын излейди, законланы игилендириу жаны бла башламчылыкъла этеди;  азатланнган тийрелени аягъы юсюне этерге болушады; алада жашагъанлагъа абериле жыйышдырыу эмда жетдириу бла кюрешеди, къазауатдан къайтханлагъа къайгъырады – ала урунурча, жамауат эмда политика жашаугъа къошулурча мадарла этеди… 
Къырал Думагъа «Единая Россиядан» сайланнган депутатладан кёплери, регион эмда муниципал оноучуланы къаууму  кеслери да къазауатха кетгендиле, Ата журт ючюн сермешедиле. Алай бла ала уллу батырлыкъ, жигитлик да этгендиле эмда сый-намысха тийишли болгъандыла. Сау болугъуз»,- дегенди Владимир Путин.
 Президент дагъыда талай магъаналы башламчылыкъны туура этгенди, ол санда «Заманны жигитлери» программаны кенгертирге эмда регионлада бардырылырча этерге буюргъанды. 
Къырал Башчыны чакъырыу сёзюню юсюнден оюмун айта, Казбек Коков былай белгилегенди: «Миллет Башчыбызны сёлешиуюню баш магъанасы ма бу болгъанды: «биз къурай тургъан эмда келир тёлюлеге сакъларгъа сюйген Россей» - «кесини  бир жерде да болмагъанча тамаша цивилизациясы бла, кёп миллетлеге, тюрлю-тюрлю динлеге бёлюннгенине да къарамай, бирликни сакълап келген эмда мындан ары да сакъларыкъ халкъы бла айырмалыды».
Президент тышындан не бек къоркъутуп, тыйгъычла салып кюрешселе да, Россейге алгъа барыргъа чырмау эталмазлыкъларын чертип айтханды. «Россей тюз эмда кючлю болгъанына ишексиз болуп алгъа таукел барады»,- дегенди.
Бюгюнлюкде Россейни халкъы бир заманда да болмагъанча бирикгенди, Президентине ышанады. Халкъыбызны Ата журту ючюн жууаплылыгъы былай уллу бир заманда да болмагъанды. Жангы заманны алгъа элтген кюч ма олду.
Владимир Владимирович къыралны баш партиясын энчи аскер операциядан къайтхан аскерчилени къайгъыларын кёрюрге, Ала «Жигитлени заманы» программагъа тюшерча мадарла этерге чакъыргъанды. «Аллай адамланы излегиз, табыгъыз эмда алагъа билим, ишчи сынау да алыргъа болушугъуз»,- дегенди.
Къыралны Башчысы проектге СВО-ну ветеранларын да къошаргъа эмда регионлагъа жаяргъа буюргъанды. «Биз» деген сёзню шёндю бирикдирген кючю барды». «Кесибизникилени атмайбыз»  деген чакъырыу Россейде хар адамгъа да жууукъду. «Фронт да бюгюнлюкде жаланда къазауат баргъан жер бла чекленип къалмайды, ол жашауну хар бёлюмю бла байламлыды».
Президент дагъыда партияны школлагъа тынгылы ремонт этиу, юйюрлеге болушуу дегенча башламчылыкъларын къабыл кёргенди. Кёп болмай бардырылгъан пресс-конференциядача, Владимир Путин властьла хар атламларын адамланы оюмларын эсге алып этерге керек болгъанларын эсгертгенди. «Инсанны ырахатлыгъы, россейли юйюрлени къолайлыкълары  тёрде болургъа керекдиле»,- деп чертгенди».