КъМР-ни Парламентини кезиулю жыйылыу РФ-ни Конституциясыны кюнюнде бардырылгъанды. Кенгешни ача, спикер Татьяна Егорова депутатланы байрам бла алгъышлагъанды. Къыралны Баш закону шёндюгю Россейни тарыхында къыйын кезиуде жарашдырылгъанын эмда аны къыраллыгъын кючлеуде, жалынчакъсызлыгъын сакълауда магъаналы жерни тутханын белгилегенди.
- Ол къыралыбызны политика ызыны мурдорун къурагъанды, адамны эм инсанны эркинликлерин бла праволарын белгилегенди. Ол РФ-де уллу эм багъалы байрамладан бириди. Барыгъызны да аны бла алгъышлайма эмда саулукъ, мамырлыкъ, ахшылыкъла, жетишимле тежейме,-дегенди законла чыгъарыучу органны башчысы.
Парламентарийле «КъМР-ни жер-жерли самоуправление эм къырал власть органларыны шахарлада къурулуш бардырыу жаны бла жууаплылыкъларыны юсюнден» республикалы законну проектин сюзгендиле. Къурулуш, жашау журт-коммунал мюлк эм отлукъ энергетика жаны бла комитетни башчысы Заурбек Кумалов ангылатханыча, эллени, шахарланы эм муниципал районланы къурулуш бардырыу жаны бла полномочияларыны бир-бирлери республиканы къырал власть органларына бериледиле.
«Жандауурлукъ ишни эм добровольчествону (волонтёр иш) юсюнден» федерал законну 171-чи статьясына тюзетиулени тинтгендиле. Федерал законопроектни КъМР-ни Парламентини Урунуу, социал политика, саулукъ сакълау эм ветеранланы ишлери жаны бла комитети жарашдыргъанды. Аны башчысы Хусейн Кажаров айтханыча, документни СВО-ну волонтёрларыны ассоциациясы къурагъанды. Анда сёз энчи аскер операциягъа къатышханлагъа жандауурлукъ болушлукъ этген кезиуде жашауларына, саулукъларына заран салыннган волонтёрлагъа ахча тёлеуню юсюнден барады.
- Законда доброволецлеге (волонтёрлагъа) социал магъаналы жумушланы толтургъан кезиуде жашауларына, саулукъларына къоркъуу салыннган кезиуде тёлеуле тохташдырылыпдыла. Проектде уа болгъан жорукълагъа къошакъ этерге белгиленеди. Анга кёре, волонтёрланы жашауларына, саулукъларына къоркъуулу жумушлагъа Украинада, ДНР-де, ЛНР-де, Запорожье эм Херсон областьлада энчи аскер операция бардырылгъан жерледе аскерчилеге бла мамыр адамлагъа, жандауурлукъ эм техника болушлукъ этген кезиуде ачыгъанлагъа ахча тёлеуле тохташдырыуну юсюнден барады сёз. Законопроект къабыл кёрюлсе, этилген къоранчла федерал бюджетден берилликдиле. Законну проекти, эсгертиуле бла тюзетиуле кийирир мурат бла, РФ-ни Федерал Жыйылыуунда Законла жарашдырыучуланы советини къараууна берилгенди,-дегенди Хусейн Кажаров.
Жыйылыуда сюзюлген законопроектле сейирлери болгъан органлагъа ашырылгъандыла. Ала тинтилгенден сора, алагъа Парламентни жыйылыуунда къараллыкъды.
Депутатла КъМР-ни Парламентини 2025 жылда жай сессияда ишлерини тизмесин да сюзгендиле, дагъыда федерал законопроектлеге эмда РФ-ни субъектлеринде коллегаларыны законодательный башламчылыкъларына да къарагъандыла. Алада хакъсыз юридический болушлукъну, осуйлукъну, эл мюлк жерлени хайырланыуну юслеринден айтылады.
Президиумда регионладан берилген башламчылыкълагъа да къаралгъанды, ол санда СВО-гъа баргъан аскерчилени окъутхан аралада «А» эм «В1» категориялагъа водительлени юйретиуню, «Профессионал файдагъа налог» энчи низам бла хайырланнганланы, ала аш-суу хазырлагъанда, инсанланы къоркъуусузлукъларын сакълау жаны бла федерал законнга тюзетиулеге да.
Президиум саулукъ сакълауда ишлеген къауум адамны КъМР-ни Парламентини Сыйлы грамотасы бла саугъаларгъа оноуну да чыгъаргъанды.
КъМР-ни Парламентини
пресс-службасы.
