Искусстволаны Шимал-Кавказ къырал институтуну колледжинде Россейде Юйюрню жылына аталгъан гала-концерт бардырылгъанды. Анга КъМР-ни искусстволарыны сабий школлары къатышхандыла. 

Сахнагъа чыкъгъан сабийлени, абаданланы да бирлешдирген бир шарт бар эди: ала барысы да музыкалы юйюрледен эдиле. Тёлюден тёлюге  ётген музыкагъа сюймеклик, анга къуллукъ этиу, аны ариулугъун  жамауатха ачыкълау: бу шартла битеу залгъа жыйылгъан юйюрледе эслене эдиле. Дагъыда бу концерт бла Искусстволаны колледжи тёрели «Декабрь ингирлени» башлагъанды, ала эки ыйыкъ барлыкъдыла. 
Институтну ректору Рахайланы Анатолий: «Россейде Юйюрню жылы бошала турады, алай жыл ахырына жетеди, юйюр а  къыралны да, хар бирибизни да мурдоруду. Бюгюн музыка юйюрле жыйылгъандыла бу залгъа. Музыка бизни барыбызны да байлагъан жарыкъ кючдю. Келе тургъан жыл жарыкъ болсун, мамырлыкъдан, сюймекликден толсун!» – дегенди. 
КъМР-ни искусстволарыны школларыны бирлешген хору Минковну «Юйюр», Тухмановну «Мени Ата журтум» эм башха чыгъармаланы жырлагъанды. Ызы бла бир юйюрде жашагъан музыкантла  усталыкъларын кёргюзтгендиле. КъМР-ни эм Ингушетияны сыйлы артисти Моттайланы Тимур эм Шимал Осетияны маданиятыны сыйлы ишчиси Моттайланы Регина да жыйылгъанланы къууандыргъандыла.  Дагъыда Нальчик шахарны паркыны эстрада-духовой оркестри да къызыу къарслагъа тийишли болгъанды. 
Музыка ингир бийик даражада озгъанды эм бизни республикада кёп  фахмулу адамла жашагъанына шагъатлыкъ этгенди. «Декабрь ингирле» уа искусстволаны колледжинде барыбызны да сакълайдыла!

Къапланланы Марзият.