Бахъсэн щIыналъэм хыхьэ Къулъкъужын Ищхъэрэ, Шэрэдж щIыналъэм и Ау­шыджэр къуажэхэм щагъэ­лъэпIащ УФ-м щIыхь зиIэ и художник, КъБР-м и цIыхубэ сурэтыщI, ХудожествэхэмкIэ Урысей Академием хэт КIыщ Мухьэдин. Зэхыхьэхэр къызэрагъэпэщащ ди лъэп­къэгъу сурэтыщI цIэрыIуэр къызэралъхурэ илъэс 85-рэ зэрырикъум и щIыхькIэ. 

Къулъкъужын Ищхъэрэ къуажэм ГъуазджэхэмкIэ и сабий школ, Къып Му­хьэмэд и цIэр зезыхьэм и унафэщI КIуж Ритэ, еджапIэм и лэжьакIуэхэм, адыгэ фащэ­хэр зыщыгъ я гъэсэнхэм лъэпкъ шхыныгъуэхэмрэ махъсымэмрэ яIыгъыу, зы гупи къафэу гуапэу ирагъэблэ­гъащ КIыщ Мухьэдинрэ и щхьэгъусэ икIи и менеджер Жаклинрэ. Школым хьэщIэ­хэм зыщрагъэплъыхьащ, ны­бжьыщIэхэм я лэжьыгъэхэри ирагъэлъэгъуащ. 
Бахъсэн щIыналъэм и администрацэм и Iэтащхьэм и къуэ­дзэ Iэхъуэбэч Андзор КIыщ Мухьэдин ехъуэхъуа нэужь, район уна­фэщIым и Iэ зыщIэлъ щIыхь тхылъ иритыжащ. Абы къыхигъэщащ КIыщ Мухьэдин дунейпсо сурэтыщI гъуазджэм хуищIа хэлъхьэныгъэр къы­зэры­лъы­тэгъуейр, и лэ­жьы­гъэхэм щIэ­блэм я дежкIэ мыхьэ­нэшхуэ зэраIэр. 
- Дэнэ щIыпIэ сыщыIэми, сыт хуэдэ къэрал сыщыла­жьэми, сыщалъхуа щIыналъэм сыкъыхуопабгъэ. Мып­хуэдиз зэфIэкI зиIэ сабийхэр зэкIуа­лIэ школыр сигу ирихьащ. НыбжьыщIэхэм я дэтхэнэ ­лэ­жьыгъэми хыболъа­гъуэ лъэпкъ щэнхабзэмрэ тхы­дэмрэ пыщIэныгъэ зэры­хуа­Iэр. ЩIэблэм гъуазджэм щаIэ зэфIэкIхэр къызэрызэкъуахым укIэлъыплъыну гъэ­щIэгъуэнщ. Мы лэжьыгъэхэр щы­плъагъукIэ, къэкIуэнум фIы­­кIэ ущымыгугъынкIэ Iэмал иIэкъым! - жиIащ Мухьэдин. 
Зэхыхьэ гуапэм хуа­гъэ­хьэзыра концертым хьэ­щIэ­хэр ирагъэплъащ.
Къы­кIэ­лъы­кIуэу КIыщ Му­хьэдинрэ Жаклинрэ хуагъэзащ Шэ­рэдж щIыналъэм хыхьэ Ау­шыджэр къуажэм и сурэтыщI ныбжьыщIэхэм. 
Шэрэдж районым и администрацэм и Iэтащхьэ Кульбаев Алан зэрыжиIамкIэ, сабийхэм я дежкIэ зэIущIэр щхьэ­пэщ. КIыщ Мухьэдин и лэ­жьыгъэ щхъуэкIэплъыкIэхэр ду­ней псом щыпсэухэм ялъэгъуащ икIи музей цIэрыIуэхэм щахъумэр. 
Къэбгъэлъагъуэмэ, художникыр Шэрэдж щIыналъэм ещанэу кIуащ. 2007 гъэм ­Му­хьэдин Балъкъэр Ипщэ ­къуажэм и курыт еджапIэ №1-м и гъэсэнхэм папщIэ дерсхэр итауэ щытащ. Къы­кIэ­лъыкIуэу, Балъкъэр Ипщэ къуа­жэм и еджакIуэхэм 2017 гъэм яIущIащ КIыщыр. Сурэт щIы­ным дихьэххэм гукъинэж ящыхъуат а зэхыхьэхэр. 
Мы зэIущIэр щIэдзапIэ хуэхъуащ дяпэкIи ахэр зэдэ­лэжьэну зэраубзыхуам. Гуэл щхъуантIэхэм я Iэгъуэблагъэм щыIэ мозаикэ стеллэр, КIыщ Мухьэдин и лэжьыгъэр, къагъэщIэрэщIэжынущ, нэхъапэм иIа теплъэр зэрагъэ­пэщыжу.
КIыщ Мухьэдин щIэблэм щепсалъэм къыхигъэщащ балигъхэм нэхърэ сабийхэм сурэтхэр нэхъыфIу зэращIыр, абыхэм я гупсысэмрэ зэхэ­щIыкIымрэ зыми зэримылъахъэр. ЗэIущIэм и пэ къихуэу, ныбжьыщIэхэм Мухьэдин и лэжьыгъэхэм сурэтхэр къы­т­ращIыкIати, КIыщыр тепсэ­лъы­хьащ ахэр зытеухуам.
КъищынэмыщIауэ, Шэ­джэм къуажэм ЩэнхабзэмкIэ и унэм, ДыщэкI КIунэ и цIэр зезыхьэм, щагъэлъэпIащ «Че­­гемский родник-2024» IX гъуаз­джэхэмкIэ урысейпсо фестивалым, КIыщ Мухьэдин и цIэкIэ къызэрагъэпэщам, щы­текIуахэр. Абы хыхьэу екIуэ­­кIащ концерт гукъинэжи.
ТЕКIУЖЬ  Заретэ.