2024 гъэм и щIышылэ - фокIадэ мазэхэм къриубыдэу Къэбэрдей-Балъкъэрым и мылъку нэхъыщхьэм инвестицэ ахъшэу ягъэкIуам и куэдагъыр 2023 гъэм и апхуэдэ пIалъэм щыIа бжыгъэхэм елъытауэ проценти 146,2-рэ хъуащ - сом мелард 39,2-рэ хуэзэу.

Кавказ Ищхъэрэм СтатистикэмкIэ и управленэм къызэритамкIэ, КИФЩI-м хыхьэ щIыналъэхэм ящыщу ди республикэр абыкIэ япэ итщ. Къапщытэж лъэхъэнэм къриубыдэу Шэшэн республикэм капитал нэхъыщхьэм инвестицэу игъэкIуам и куэдагъым процент 27-кIэ хигъэхъуащ, Дагъыстэным - процент 16-кIэ, Ставрополь крайм – процент 1,2-кIэ. Мыдрейуэ, Ингушым, Къэрэшей-Шэрджэсым, Осетие Ищхъэрэ – Аланием проценти 5 - 26-кIэ кIэрагъэхуащ.

Ди республикэм инвестицэ зыужьыныгъэ зэригъуэтыр зи фIыгъэр зыбжанэ мэхъу: ар ехьэжьа пэхуэщIэшхуэхэр, псори зэхэту сом меларди 144,5-рэ я уасэу, щIыналъэм зэрыщагъэзащIэрщ, лъэпкъ пэхуэщIэхэр ныкъусаныгъэншэу зэрыщылажьэрщ, инвестицэм пыщIа Iуэхугъуэхэм лъэныкъуэ куэдым хуэгъэпса къэрал дэIэпыкъуныгъэхэр зэрагъуэтырщ.

Республикэм и зыужьыныгъэм хэлъхьэныгъэфIхэр хуэзыщI, япэ иригъэщ инвестицэхэр нэхъыбэу зыхалъхьэр мэкъумэш, ухуэныгъэ, туризм, промышленность IэнатIэхэрщ.

ХЬЭЩЫКЪУЕЙ Олег.