КъБР-м и Лъэпкъ музейм щагъэлъагъуэ балъкъэр художник, график, скуль­птор, республикэм и Къэрал саугъэтым и лауреат Ахматов Лиуан и лэжьыгъэхэр щызэхуэхьэса «Вечная дорога» выставкэр. Ар къызэрагъэпэщащ сурэтыщIыр къызэралъхурэ илъэс 65-рэ зэрырикъум и щIыхькIэ. 

- Художник Iэзэ, щIэныгъэ зыбгъэдэлъ Ахматов Лиуан и лэжьыгъэхэм деплъыну Iэмал дызэриIэр гуапэщ! СурэтыщI гъуазджэм и лIэужьыгъуэ зыбжанэм Лиуан хэлъхьэныгъэфIхэр хуищIащ. И лэжьыгъэ щхъуэкIэплъыкIэхэм нэр ягъэгу­фIэ къудей мыхъуу, гупсысэ ини зэращIэлъым укъагъэуIэбжь, – жиIащ КъБР-м щэнхабзэмкIэ и министрым и къуэдзэ Карчаевэ Iэминэ. – Лиуан и лэжьыгъэхэм къыщегъэлъагъуэ и щIыналъэмрэ абы щыпсэу цIыхухэмрэ зыхилъхьэ щымыIэу фIыуэ зэрилъагъур, и лъэпкъ тхыдэм фIыуэ зэрыщыгъуазэр, и хэкуэгъухэм я гуфIэгъуэри гузэвэ­гъуэри зэрадигуэшыр. ДяпэкIи и зэ­фIэ­кIым хигъэхъуэну, и лэжьыгъэ гъэ­щIэ­гъуэнхэмкIэ дигъэгуфIэну сохъуэхъу!
КъБР-м и Парламентым щэнхабзэмкIэ, граждан жылагъуэм зегъэу­жьы­нымрэ хъыбарегъащIэ политикэмкIэ и комитетым и унафэщI Текуев Амырбий сурэтыщI гъуазджэр фIыуэ зылъагъу­хэм фIэхъус гуапэ яриха нэужь, Ахматов Лиуан ехъуэхъуащ узыншагъэ быдэ иIэну, гъащIэ кIыхь хъуну. СурэтыщIым и лъэпкъэгъухэм я псэу­кIэр, IуэрыIуатэр къыщигъэлъэгъуэжа и лэжьыгъэхэм псэгъэгуфIэ, гъэ­сэныгъэ мыхьэнэшхуэ зэраIэр, гъуазджэм щиIэ зэфIэкIыр зэрынэрылъагъур къыхигъэщащ Амырбий жиIам. 
КПРФ-м республикэм щиIэ къудамэм и япэ секретарь, КъБР-м и Парламентым и депутат Пащты Борис и гуапэу жиIащ Лиуанрэ абырэ къызэрызэдэ­хъуар, нобэр къыздэсми зэрызэныбжьэгъур, абы и лэжьыгъэхэм тхакIуэ-усакIуэхэу Кулиев Къайсын, Мечиев Кязим, ЩоджэнцIыкIу Алий, СССР-м и ЛIы­хъужь Байсултанов Алим, сурэтыщI­хэм я IэдакъэщIэкIхэр зэхуэзыхьэсу щыта Хаджиев Даниял, нэгъуэщI цIыху цIэрыIуэхэм увыпIэфI зэрыщаубыдыр. Ар и ныбжьэгъум ехъуэхъуащ иджыри гъэлъэгъуэныгъэ куэд къехъулIэну. 
КъБР-м и СурэтыщIхэм я зэгухьэныгъэм и унафэщI Къаныкъуэ Жаннэ къеджащ УФ-м щIыхь зиIэ и художник,      КъБР-м и цIыхубэ сурэтыщI КIыщ Му­хьэдинрэ и щхьэгъусэ икIи и менеджер Жаклинрэ, ХудожествэхэмкIэ Урысей Академием хэт, Санкт-Петербург щып­сэу икIи щылажьэ СэвкIуий Хьэмид Ли­уан къыхуагъэхьа хъуэхъу тхыгъэхэм.
Санкт-Петербург и Эрмитажым и лэ­жьакIуэ, искусствовед, эксперт Кирилловэ Риммэ къытеувыIащ Ахматов Ли­уан дищIа лэжьыгъэхэм, и Iэдакъэ­щIэкIхэм щыщу нэхъ игу дыхьа сурэтищ къызэрищэхуам, иужькIэ ахэр Урыс музейм тыгъэ хуищIыну зэримурадым. 
Гъэлъэгъуэныгъэр къыщызэIуахым къэпсэлъащ КъБР-м и цIыхубэ усакIуэ Беппаев МутIэлип, УФ-м и СурэтыщIхэм я зэгухьэныгъэм хэт Тамбиев Бурхан, «100 шагов к Кайсыну» фондым и уна­фэщI Тетуев Хьэдис, УФ-м и Сурэ­тыщIхэм я зэгухьэныгъэм хэт, Ставрополь крайм и сурэтыщIхэм я эксперт гупым хэт, КъШР-м и цIыхубэ художник Узденов Iэмин, коллекционер, псапащIэ Локьяев Рашид, УФ-м и СурэтыщIхэм я зэгухьэныгъэм хэт сурэтыщI-дизайнер, егъэджакIуэ Французов Казбек. 
Къэпсэлъахэм жаIащ Лиуан и сурэтхэм, скульптурэхэм лъэпкъ тхыдэр, Iуэ­рыIуатэр, хабзэр къызэрытещыр, и сабиигъуэм и нэгу щIэкIахэр, ди щIыналъэм и щIыпIэ дахэхэр къызэрыщигъэ­лъэгъуар, сурэтыщIым и Iэдакъэ­щIэкI­хэм зэпымыууэ щIэ зэры­хэп­лъа­гъуэр.
Ахматов Лиуан фIыщIэ яхуищIащ и гъэлъэгъуэныгъэм къекIуэлIахэм, псалъэ гуапэхэмрэ хъуэхъухэмрэ къыху­жызыIахэм. Мы гъэлъэгъуэныгъэр щIы­шылэм ику пщIондэ щыIэнущ.

Сурэтхэр Къарей Элинэ трихащ.

ТЕКIУЖЬ Заретэ.