Хэкум и ЛIыхъужьхэм я махуэм ехьэлIа Iуэхухэм хэтащ Урысейм и суд приставхэм я фе­деральнэ къулыкъум и уп­рав­ленэу КъБР-м щыIэм и лэ­жьакIуэхэри. 

Налшык дэт школ № 6-м а ма­хуэм щекIуэкIащ «ЛIыхъу­жьым и партэ» къыщызэIуаха зэ­хы­хьэ. Абы щеджауэ дзэ Iуэху хэхам хэта, ЛIыгъэм и орденрэ Джаурджий щихъым и жор дамыгъэмрэ зыхуа­гъэфэща Тотоев  Руслан Сергей и къуэм теухуа Iуэхум кърихьэ­лIащ щIыпIэ администрацэм, КъБР-м ЩIалэ­гъуалэм я Iуэху­хэмкIэ и министерствэм я лIы­кIуэ­хэр, Тотоевым и Iыхьлыхэр, егъэджакIуэхэмрэ школа­кIуэ­хэм­рэ. 
«ЛIыхъужьым и партэр» къы­зэIуихащ Урысейм и суд прис­тав­хэм я федеральнэ къулы­къум и управленэу КъБР-м щыIэм и Iэтащхьэм и къуэдзэ Литовкэ Наталье. 
Къызэхуэсахэм дзэ Iуэху хэхам хэкIуэдахэм дакъикъэкIэ щыму яхуэщыгъуэри, удз гъэгъахэр ягъэтIылъащ. 
Къыхэгъэщыпхъэщ а махуэ дыдэм суд пристав­хэмрэ Управ­ленэм и щIалэгъуалэ советым щыщхэмрэ зэгъусэу лъы зэратар. Мы Iуэхум хэтащ цIыху 20-м щIигъу. Ар хуабжьу къахуэ­щхьэпэнущ сымаджэщхэм щы­зэ­Iэзэхэм.
А Iуэхум зэкъуигъэуващ лъы ты­ным жыджэру хэтхэмрэ иджы япэу къыхыхьахэмрэ. Ведомст­вэм и лэжьакIуэхэр медицинэ къэп­щытэныгъэм пхыкIри, дэтхэнэми лъы миллилитр 450-рэ зыхрагъэшащ.

БАХЪСЭН  Лянэ.